Komêka karkeranê înşaatî yê kurdan di perey maruzê hêrişê nîjadperestî amebî. Karkero kurd Ozkan Tokay netîceya hêrişê bi çekan de dinyaya xo bedilna.

Dadîya Ozkanî Nurcane Tokay hêrişo nîjadperest şermezar kerd û waşt ke kiştoxî bêrê tepiştene.

Dadî Nurcana ke dejê lajê xo ra nêeşkayêne qisey bikera vat: ''Lajê mi heta şanî têşan û vêşan înşaatan de xebitîyayêne. Lajê mi rê nêheqîye ameye kerdene. Bi bahaneya tozî lajê mi kişîya. Zaliman pê 4 guleyan lajê mi kişt. Senî kiştoxê lajê mi hema zî nêtepişîyayî?''

Waya Ozkanî Rewşane Tokay zî îfade kerd ke ganî kiştoxanê birayê ci ra hesab bêro persayene. Rewşane vat: ''Birayê mi zewijnaye bi, dergûşê ci di menge bi. O dergûş verî ke babîyê xo bivîno babî kişîya. Dewlete vana ma way û birayê yewbînan ê. Edalet kotî de yo? Senî nê kiştoxî remenê? Qaşo ma pêro hemwelatîyê na dewlete yê. Polîsan çira ma rê vat 'Cenazaya xo bigêrê tîya ra şorê'? ''