Buroya Çapemenî û Têkilîye ya PAKî: Komara Kurdistanî sereberzîya heme Kurdistanîyanê dinya ya

Komara Kurdistanî bi Serekkomarîya Pêşewa Qazî Mihemedî 75 serrî verê cû roja 22.01.1946î de Meydanê Çarçirayî yê bajarê Rojhilatê Kurdistanî Mehabad de Komara Kurdistanî amey îlankerdene. A roje Meydanê Çarçirayî de temsîlkarê her çar perçeyanê Kurdistanî estbî.

Komara Kurdistanî roja 17.12.1946î de hetê Dewleta Îranî ra şîya ra. Qazî Mihemed û 15 îdarekarê Komara Kurdistanî roja 31ê Adara 1947î de Meydanê Çarçirayî de hetê Dewleta Îranî ra ameyî dardekerdene. Komara Kurdistanî (Komara Mehabadî) tarîxê Kurdistanî de tecrûbeyêka zaf pîle û muhîm a ke heme Kurdistanîyê dinya pê serberz bîyê. 

Cu, helwest , şexsîyet û wasîyet û pawitişnameyê Pêşewa Qazî Mihemedî yê mehkema eslê xo de raybaz û hişmendîya Kurdistanî û armancê Komara Kurdistanî pêşkêşê ma keno. 

Wasîyet û pawitişnameyê Pêşewa Qazî Mihemedî seba ewroyî zî wazîfeyê ma yo netewî, niştimanî û tarîxî nîşanê ma dano.

Pêşewa Qazî Mihmed vano, wayîrê Ala Kurdistanî vejyêne. Vano, estbîyayîşê miletê Kurd, estbîyayîşê Kurdistanî, pawitiş û hişmendîya azadî û dewletbîyatîşî wa bingehê sîyasetê şima bê. 

Pêşewa Qazî Mihemed vano, yewbînan rê dişmenetî mekêne, bi dişmenan nênê xapînayîş. Vano, wa hemkarî, yewitî, tifaq, hetkarî û ardimkerdiş mîyanê şima de kêmî nêbê. Vano, yewbînan rê hurmet bikêne. Wayîrê kede û xebate û têkoşînê heme şehîd û kedkaranê dewaya azadîya Kurdistanî vejyêne. 

Pêşewa Qazî Mihemed vatbi  ‘Ala Kurdistanî rojêk do bêra mehkemeya ke ma tede ameyî muhakemekerdiş ser o zî aliqnayîş’. 

A ala ke Pêşewa Qazî Mihemedî teslîmê Mele Mistefa Barzanî kerdbî bi gonîya deshezaran şehîdan, bi têkoşînêkê qehramanan, ewro serê Parlementoyê Dewleta Federale ya Başûrê Kurdistanî şîyena têra. 

Pêşewa Qazî Mihemed veyneno temsîlkaranê 50 milyon Kurdanê dinya: Senî ke ma pê way û birayanê xo ê her çar perçeyanê Kurdistanî Mehabad de Komara Kurdistanî îlan kerd; şima zî her perçeyêkê Kurdistanî de, her ca de wayîrê qezencanê Kurdan vejyêne.

Pêşewa Qazî Mihemed Serek, rayver û endamê partîyan rê vano: 
Ne Serekîya şima, ne rayvertîya şima, ne namê partîyanê şima dewaya azadîya Kurdistanî qîmetêr nîya. 

Pêşewa Qazî Mihemed, wasîyetnameyê xo de raybazê  ‘Azadî seba Kurdistanî, Kurdistan de azadî’ nîşanê ma dano. Pêşewa Qazî Mihemed ma heminan rê vano: Bixebityêne, bimusêne, biwanêne, têkoşîn bikêne, mîyanê şarê xo de bimanêne, bi gencanê xo, cinîyan û heme komelê xo organîze bikerêne. Bibêne partî û teşkîlato komelkî, netewî. Vîr û dewa û programanê xo şarê xo rê bidêne qebûlkerdene. 

Belê, wasîyetê Pêşewa Qazî Mihemedî rayîrê azadîya her çar perçeyê Kurdistanî de akerdo. Gama ke ma ê wasîyetî bîyare ca do ruhê Pêşewa Qazî Mihemedî, yê Mele Mistefa Barzanî, yê Seyid Riza, Îhsan Nûrî Paşa, Xalid Begê Cibrî, Şex Seîd û yê heme şehîdanê Kurdistanî şa bo. 

Serrgêra îlan kerdişê Komara Kurdistanî ya 75ine de, ma Pêşewa Qazî Mihemed, Pêşewayê eskerî yê Komara Kurdistanî Mele Mustafa Barzanî û heme ronayox û kedkaranê Komara Kurdistanî, şehîdanê Komara Kurdistanî û heme şehîdanê Kurdistanî bi hurmet yad kenê.

 22.01.2021 
Buroya Çapemenî û Têkilîye ya PAKî