16î aṣma Elul 2025 de Çewlîg de Komelê Ciwantîye û Kultur ya Sîvîl di çarçoveyê Projeyê Vurnayîşê Sîvîlî de bi nuştox Seyîdxan Kurijî yew sohbet viraşt.

No sohbet ke merkezê komelî de virazîyayî de îdarekerdoxanê komel ra Îbrahîm Sudan bi kirdkî beṣdarî silam kerdî û ey ra dima, serekê Komelê Ciwantîye û Kultur ya Sîvîlî Ahmet Seyit Budakî,

derheqê komel û Projeyê Vurnayîşê Sîvîlî de malûmat da, Ahmet Seyit Budakî va ,"Sey Komelê Ciwantîye û Kultur ya Sîvîlî ma wazenê bi hetkarîyê Weqfê Demokrasî yê Ewropa (EED), mîyanê cemat de fîkîr û kulturî demokrasî vila bikerê, geṣ bikerê, ma wazenê ziwan û kuturê xo rê zî xizmet bikerê, no ridra ma bi nuştoxo ercîyayeyê Seyîdxan Kurijî reyde wina yew sohbeto taybetî hedre kerd“.

Seyîdxan Kurijî verecû îdarekerdoxanî komel rê spas kerd, muhimîye komelanê sîvîl, xebata sîvîl û sîvîl cemat sero vînayê xo ard ziwan û cuwa pey terîfî ziwan û muhimîyê ziwanê dadî sero vînayê xo ard ziwan. Seyîdxan Kurij va, „Ziwan nasnameyo însan o, bi ziwanê dadî de tarîx û kulturî ṣarî nesil ra nesîl neqil beno, ziwan vîndî bo, milet zî bena vîndî. Hetê pedagojî ra zî ziwanê dadî zaf muhîm o, yew qic ziwanê dadîyê xo hol bizano, perwerde de zî serkewte beno û ziwananî bînan zî baṣ museno“.

Nuştox Seyîdxan Kurij, cuwa pey kitabanê xo ra sonikî û hîkayeyî wendî û balê beṣdaran ant ke zazakî ho tehlukeyê vîndibîyayîşî de yo û lazimo ke bêro pawitiş. Kurij persî beşdarana cewab kerdî û firsend da ke ey zî derheqê ziwan û edebîyat de fîkrê xo bîyarî ziwan. Îtya de derheqê pawitiş û ciwîyayîşê zazakî de yew sohbetê manedar ame viraştiş. Na çalakî ke bi eleqeyêko gird amê pêşwazîkerdiş, seba ziwan û edebîyatê kirdkî yew gameka manedar bî.

Peynîyê sohbet de Seyîdxan Kurij seba wendoxan kîtabê xo îmza kerdî.

Çime: Zazakî News