Her şeş partiyên opozîsyona Tirkiyê ku beriya niha li ser amadekirina belgeya vegera li sîstema parlamentariyê û betalkirina sîstema serokomariyê li hev kiribûn, îro 28ê Sibata 2022yan civîneke danasîna wê belgeyê li dar xistin û serokên 6 partiyan jî belge îmze kirin.
Serokên şeş partiyên opozisyona Tirkiyê îro li Enqerê civiyan û bernameya xwe ya hevbeş bi belgeya bi navê “Sîstema Parlamenteriyê ya Bihêz” ji raya giştî eşkere kirin.
Serokê CHPê Kemal Kılıçdaroglu, Seroka İYİ Partiyê Meral Akşener, Serokê Partiya Seadetê Temel Karamollaoglu, Serokê Partiya Pêşerojê Ahmet Davutoglu, Serokê Partiya DEVA Ali Babacan û Serokê Partiya Demokrat Gultekin Uysal piştî danasîna bernameya sîstema parlamentariyê ya hevbeş ew belge îmze kirin.
Di belgeya navborî de, tê xwestin ku sîstema serokomariyê ya niha ku Serokomar û Serokê Giştî yê AKPê birêve dibe were hilweşandin û ji nû ve Tirkiyê vegerînin sîstema parlamentariyê ku erkên daraz, rêveberî û yasadanînê ji hev bên cuda kirin.
Di belgeya ku ji 23 rûpelan pêk tê de, di gelek warên rêveberiya Tirkiyê, dadwerî û yasayan de di çarçoveya vegerandina sîstema parlamentariyê de, guhertînên bingehîn hatine rêzkirin.