Hat diyarkirin ku çav li rê ye îro 11ê Mijdarê şandeke Eniya Aştî û Azadiyê ya ENKS pêşengiya wê dike, li Enqerê bi Wezareta Derve ya Tirkiyê re bicive.
Li gorî zanyariyan Eniya Aştî û Azadiyê îro gihîştiye Enqerê û tê çaverêkirin derbarê pêşhatên dawî yên rojavayê Kurdistanê û Sûriyê de bi şandeke Wezareta Derve ya Tirkiyê re bicive.
Di şanda Eniya Aştî û Azadiyê de ji ENKSê Mihemed Îsmaîl û Feysel Oso, ji Rêxistina Asûrî ya Demokratîk Gebriyêl Muşê û Dawûd Dawûd û ji Teyar El Xed jî Emîr Dendel û Wasif El Zaîd cî digirin.
Eniya Aştî û Azadiyê 28ê Tîrmeha îsal li bajarê Qamişlo, bi beşdariya Encûmena Niştimanî ya Kurdî (ENKS), Rêxistina Asûrî ya Demokratîk, Teyar El Xed (Şepêla Pêşerojê ya Sûrî) û Encûmena Erebî li Cizîr û Ferêt hatibû damezirandin.
Eniya Aştî û Azadiyê, hevpeymaniyeke siyasî ye ku di navbera hêzên Sûrî yên hewl didin sîstemeke firehalî, nenavendî li Sûriyê ava bikin de hatiye pêkanîn.
Eniya Aştî û Azadiyê li gor armancên ji xwe re danîne, hewl dide diyalog û danûstandinê bi hemû aliyên opozîsyona Sûriyê re bike û bi arasteya bidawîanîna êş û azarên Sûriyan, bi riya çareseriyeke siyasî ya giştgîr û li gor biryarên navdewletî, pêwendiyê bi aliyên herêmî û navdewletî re dike.