Hikûmeta demkî ya Sûriyeyê di pêvajoya entegrasyonê ya bi Hêzên Demokratîk ên Sûriyeyê (HSD) re ku demek dirêj e danûstandin li ser tê kirin de gaveke girîng avêtiye. Wezîrê Parastinê Murhaf Ebû Kasra ragihand ku Şamê bi fermî nexşerêyeke 13 xalî pêşkêş kiriye ku entegrasyona HSD di nav avahiya dewletê de destnîşan dike.
Li gorî rayedarekî hikûmetê ku ji medyaya +963 ya Sûriyeyê re axivî, mekanîzmaya pêkanînê ya ku çawa HSD dê di nav saziyên dewletê de were entegrekirin dê di rojên pêş de bi raya giştî re were ragihandin. Karbidest diyar kir ku hûrgulî hîn nehatine parvekirin, lê pêvajo hem aliyên siyasî û hem jî yên leşkerî dihewîne.
Ev gav wekî beşek girîng a danûstandinên li ser ewlehî, kontrola axê û rêveberiyê di dema veguherîna nazik a Sûriyeyê de piştî hilweşîna rejîma Baas tê dîtin.
Li gorî pêşniyara ku ji hêla Şamê ve ji HSD re hatiye pêşkêş kirin, hêmanên HSD dê di nav artêşa Sûriyeyê de bibin sê beşên cuda.
Beşa yekem wekî Beşa Parastina Sînor tê pênase kirin, ku berpirsiyarê ewlehiya sînorên bakur-rojhilat e; Beşa duyem wekî Beşa Jinan, ku yekîneyên jinan ên heyî yên HSDê diparêze; û beşa sêyem jî wekî Beşa Dijî Terorê, ku dê rasterast bi Şamê re di operasyonên li dijî komên tundrew de hevrêziyê bike.
Li gorî kovara Syria in Transition, HSD li dijî bicihkirina yekîneyên din ên artêşa Sûriyeyê li rojhilatê Firatê di nav vê avahiyê de ye û israr dike ku tenê beşên xwe li herêmê hebin.
Yek ji xalên herî krîtîk ên pêşniyarê pabendbûnek e ku yekîneyên artêş û ewlehiyê yên dilsozê Şamê dê nekevin bakurê rojhilatê Sûriyeyê. Ev rêkeftin tê vê wateyê ku HSD dê bi piranî kontrola xwe ya xweser a de facto biparêze.
Wekî din, li gorî planê,HSDê dê nûneratiyek bilind di saziyên leşkerî û ewlehiyê yên dewletê de bi dest bixe. Li gorî vê, tê pêşbînîkirin ku sê ji pozîsyonên cîgirê wezîrê parastinê, cîgirê wezîrê karên hundir û cîgirê serokê fermandariyê dê ji namzedên ku ji hêla HSDê ve têne pêşniyar kirin re werin veqetandin. Her weha tê plankirin ku bi qasî 70 efserên leşkerî yên pilebilind ên girêdayî HSDê di avahiya fermandariya artêşa nû ya Sûriyeyê de cih bigirin.
Fermandarê Giştî yê HSD’ê Mazlûm Ebdî peymana ku di 10’ê Adarê de bi rêveberiya demkî re hatiye îmzekirin wekî “bingeha Sûriyeya nû” bi nav dike. Di daxuyaniyekê de li Hesekê, Ebdî tekez kir ku peyman piştgiriya navneteweyî û herêmî wergirtiye, û belavkirina pêvajoyê li ser demê ji lezê girîngtir e.
Li gorî Ebdî, peyman ne tenê mijarên leşkerî, lê di heman demê de çarçoveyek jî vedihewîne ku dê mafên Kurdan û civakên din bi rêya guhertinên destûrî garantî bike. Ew îdia dike ku pêşeroja Reqa, Dêra Zorê û Hesekê divê ji hêla xelkê ku li van herêman dijîn ve were biryardan.
Tê gotin ku, yek ji mîmarên vê pêvajoyê, Murhaf Ebû Kasra, yekem wezîrê parastinê yê hikûmeta demkî bû ku piştî hilweşîna rejîma Esed hatibû damezrandin. Li gorî Enab Beladî, Ebû Kasra berê ji bo yekbûna hemû komên çekdar di bin Wezareta Parastinê de parêzvanî kiribû, û tekez kiribû ku divê çek tenê di destê dewletê de bin.
Di daxuyaniya 24ê Kanûnê de hat diyarkirin ku lihevkirinek hatiye kirin da ku hemû fraksiyonên leşkerî yên li Sûriyeyê werin hilweşandin û ew di bin Wezareta Parastinê de werin yekkirin. Pêvajoya yekbûnê bi HSD re wekî yek ji aliyên herî krîtîk ên vê ji nû ve avakirinê derdikeve pêş.