Erdhej li parêzgeha Kirmaşanê û nêzîkî sînorê Başûrê Kurdistanê çêbû.
Li herdu navçeyên Qesrî Şîrîn û Serpêla Zehawê yên ser bi Kirmaşan a Rojhilatê Kurdistanê ve erdhejek bi hêza 4.4 pileyên Rîxterê çêbû û li Başûrê Kurdistanê jî hest bi erdhejê hate kirin.
Rêveberê Giştî yê Keşnasî û Erdhejên Herêma Kurdistanê, Fazil Îbrahîm ji Rûdawê re ragihand ku demjimêr 11:47 şeva bihorî erdhejek bi hêza 4.4 pile li Rojhilatê Kurdistanê û nêzîkî sînorê Herêma Kurdistanê çêbû û li Germiyan û Silêmaniyê jî hest bi erdhejê hate kirin.
Fazil Îbrahîm diyar kir, erdhej li nêzîkî herdu navçeyên Qesrî Şîrîn û Serpêla Zehaw ên ser bi parêzgeha Kirmaşan a Rojhilatê Kurdistanê ve çêbûye û got: "Cihê herî nêzîk ê erdhejê li Başûrê Kurdistanê bajarê Xaneqînê bû ku 28 kîlometreyan dûrî wê derê ye û welatiyên Germiyan û Silêmaniyê bi asanî hest pê kirine."
Rêveberê Giştî yê Keşnasî û Erdhejên Herêma Kurdistanê, behsa wê yekê jî kir ku kûrahiya erdhejê li navenda zeviyê 13 kîlometre bûye û got: “Li Başûrê Kurdistanê ji ber erdhejî ti zerarek nebûye.”