Navenda Nûçeyan- Li Êlihê 2’yemîn Rojên Wêjeya Kurdî ya ji alîyê Şaredarîya Êlihê, Şaxa Egîtîm Sena Êlihê, Komeleya Çand û Hunerê ya Êlihê (BART) û Komeleya Lêkolînên Ziman û Çandê ya Mereto ve 5 rojan hat birêvebirin bi dawî bû. Bernameya Rojên Wêjeyê li Navenda Çandê ya Ahmet Guneştekîn pêk hat û encama pêşbirka helbest û çîrokan a ji bo xwendekaran pêk hat hatin eşkerekirin.
Hevşaredara Êlihê Songul Korkmaz, helbestvan Berken Bereh û nivîskar Selîm Temo û nivîskarên din xelata 10 xwendekarên ketin rêza ewil dan wan.
‘ARMANCA ME PÊŞXISTINA ZIMANÊ KURDÎ YE’
Di dawîya bernameyê de Midurê Çandê yê Şaredarîya Êlihê Ahmet Ogurlu axivî û da zanîn ku piştî demek dirêj ev Rojên Wêjeya Kurdî pêk hat û bêrîkirinek di vî warî de bi dawî bû û got: “Ji niha şûn ve jî daxwaza me ew e ku bêyî ku navberên dirêj bikevin navberê mihrîcan her sal bi awayek rêkûpêk bê lidarxistin. Em malovanîya her kesê ku keda wan derbas bûye dikin. Armanca me ew e em zimanê kurdî li pêş bixin û bidin jîyîn. Dê ji bo vê pêşketinê jî çalakî û şahîyên me çandî û hunerî dewam bikin.”
Helbestvan Berken Bereh mêvanê rûmetê yê Rojên Wêjeya Kurdî bû û roja ewil a bernameyê bi Şeva Rêzgirtinê ya ji bo Bereh hatibû lidarxistin û dest pê kiribû.
Bername bi kişandina wêneyê komî yê Rojên Wêjeyê bi dawî bû.
Ajansa Mezopotamya