Dema dixwestin ji Fransayê derbasî Brîtanyayê bibin, malbateke Kurdên Rojhilatê Kurdistanê ku ji jinek, mêrek û sê zarokan pêk hatibûn, belema wan wergeriya û di nav avê de xeniqîn.

Xelîl Îrannejadê, birayê yek ji qurbaniyan ji Rûdawê re got, Resûl Îrannejadê 35 salî, Şîwa Mihemed Penahî ya 25 salî, ligel Anîta 9 salî, Armînê 6 salî û Hartînê 15 mehî ku xelkê gundê Gulînê ser bi bajarê Serdeşt bûn, di Kanala navbera Fransa û Brîtanyayê de dema xwestine derbas bibin xeniqî ne.

Cîgirê Serokê Şaredariya Dunkirk, Hervé Tourmente derbarê bûyerê de ragihandiye: “Bi baweriya min, ew 5 mîl dûrî peravê bûn, lê nizanim ew belema wan çima wergeriya ye ku belem bi xwe ya nêçîra masiyan bû û ti mercekî silametiyê têde nebûye.”

Piştî vê bûyerê tedbîrên li wê kanala navbera Fransa û Brîtanyê hatine qayîmkirin û lêkolîna derbarê bûyerê de destpê kiriye. Dozgerê Dunkirkê dibêje, ev bûyer diçe qalibê tawanê kuştinê, lê tohmetbar diyar nekiriye.

Dozgerê Dunkirk, Sebastien Pieve jî dibêje:“Lêkolîneke vekirî ji aliyê zêrevanên sînor ve destpê kiriye, di karên wiha de şarezayiya wan baştir e, ji ber serpereştiya daxilbûna xelkê û mana koçberan li Fransayê dikin, derbarê vê bûyerê de ku cihê nîgeraniya me ye, dibe ev bûyerên wiha biçin qalibê tawanê nav malbat û xweêşandina ne bi xwesteka xwe.”

Rojane bi dehan koçberên daristanên Calaisê ji rewşa dijwar direvin û plana derbasbûna Brîtanyayê dideynin. Di nav belemê de 27 koçber hebûn, 15 hatine rizgarkirin û gera bi pey koçberên din de berdewam e ku li gor zanyariyên Rûdawê, 3 kesên din ên Serdeşt piştî vê bûyerê wenda ne.

Rudaw