Partiya Demokrat a Kurdistanê li Sûriyê (PDK-S) tekez dike, ti nakokiyên aloz yên nayê çareserkirin li pêş diyaloga kurdî – kurdî tune ne.
Polîtburoya PDK-Sê îro rapora xwe ya siyasî belav kir û tê de ragihand, rawestandina diyaloga yekrêziyê (Kurdî – Kurdî) ne ji ber nakokiyên aloz e. Tevî ku hin xalên nakok hene, lê nayê wê wateyê ku nayin çareserkirin. Danûstandin dê rojên bê de careke din destpê pê bikin.
Polîtburoya PDK-Sê diyar kir, tevî ku hin daxuyaniyên neberpirsyane ji aliyê din derdikevin, lê hêvî dikin ku ev diyalog bikeve xezmeta doza netewî û niştimanî û pêwîstiyên vê qonaxê.
PDK-S di beşeke din a rapora xwe de bang li aliyên pêwendîdar ên diyalogê kir ku xwe ji çêkirina bahane û astengiyan dûr bigirin, da ku di zûtirîn dem de armanca tê xwestin pêk were.
Ji heyama zedetir ji 9 mehan e, bi serperiştiya Amerîka û piştevaniya Serokatiya Herêma Kurdistanê û Fermandarê Giştî yê HSDê Mezlûm Ebdê, ENKS û PYNK danûstandinên yekrêziyê dikin û danûstandin gihîştiye qonaxa sêyemîn. Lê ji ber sedemên teknîkî ji heyama mehekê ve ye rawestiyaye.
Polîtburoya PDK-Sê diyar kir jî, Encûmena Niştimanî ya Kurd li Sûriyê (ENKS) bi hevalbendan hewl dide binpêkirinên tên kirin bêne rawestandin û rê ji bo vegera koçberên bûyîn Efrîn, Girê Sipî û Serê Kaniyê re bê dîtin, da ku vegerin ser cihên xwe. Di wê derbarê de jî divê lêkolîneke giştgîr bê kirin, da ku êş û azara xelkê kêm bibin û bikarin xwe bi xwe birêve bibin û grûpên çekdaran ji navenda bajarên bên derxistin.