Serokê Herêma Kurdistanê Nêçîrvan Barzanî derbarê şerê li Rojavayê Kurdistanê û Sûriyeyê peyamek belav kir û bangî civaka navneteweyî kir ku erka xwe ya ji bo rêgirtina li serhildana DAIŞê pêk bîne.
Nêçîrvan Barzanî ragihand ku ew amade ne ji bo rawestandina şer û gihiştina bi agirbestê, her cûre alîkariyê pêşkêş bikin.
“Metirsiya serhildana DAIŞê heye”
Serokê Herêma Kurdistanê di daxuyaniya xwe de dilgiraniya xwe ya li hemberî şerê di navbera Artêşa Sûriyeyê û Hêzên Sûriyeya Demokratîk (HSD) de anî zimên û got:
"Em li Herêma Kurdistanê bi dilgiraniyeke mezin li berdewamiya pevçûn û rûbirûbûnên leşkerî yên di navbera hêzên Artêşa Sûriyeyê û HSDyê de dinêrin.
Berdewamiya şer û pevçûnan gefeke cidî li ser aramî û ewlehiya Sûriye û herêmê bi giştî dirust dike û metirsiya serhildana DAIŞê tîne rojevê."
“Şer pirsgirêkan çareser nake”
Nêçîrvan Barzanî diyar kir ku ew ji destpêkê ve bi aliyên pêwendîdar re di têkiliyê de ne û wiha pê de çû:
"Her ji destpêka derketina aloziyan ve em bi berdewamî li gel aliyên herêmî û navneteweyî di pêwendiyê de ne ji bo rawestandina şer û pevçûnan û girtinebera rêya guftûgo û têgihiştinê ji bo çareserkirina aştiyane ya pirsgirêkan.
Em dupat dikin ku şer û rûbirûbûna leşkerî, ti pirsgirêkan çareser nake û rewşê aloztir dike."
“Divê mafên Kurdan di destûrê de bên misogerkirin”
Serokê Herêma Kurdistanê bangî Hevpeymaniya Navneteweyî kir û tekezî li ser mafên Kurdan kir:
"Em daxwazê ji Hevpeymaniya Navneteweyî dikin ku erka xwe ya di parastina aramiyê û rêgirtina li serhildana DAIŞê de bi cih bîne.
Her wiha em dupat dikin ku em amade ne hemû hevkarî û alîkariyan pêşkêş bikin bi mebesta rawestandina şer û gihiştina bi agirbest û rêkeftinê.
Em tekez dikin ku pêwîst e mafên Kurdan û hemû pêkhateyan li Sûriyeyê parastî bin û di destûra paşerojê ya Sûriyeyê de bên misogerkirin."