Bav û dayîkeke ji Kobanî 4 zarokên wan bi hev re çêbûn, navê wan kirin Kurdistan, Barzanî, Mesûd û Nêçîrvan.
Li paytexta Sudanê bajarê Xartoumê duh roja Şemiyê 1ê Gulana 2021ê, sê kur û keçeke Elî Enwer Temo û Felek Mistefa Husên bi hev re hatin dinyayê û wan navê hersê kurên xwe kirin Barzanî, Mesûd û Nêçîrvan û navê keça xwe jî kirin Kurdistan.
Elî Enwer Temo û Felek Mistefa Husên ku xelkê Gundê Sarûncê ser bi Kobaniyê ve ne, ji Rûdawê re diyar kirin, ji ber hezkirina Mele Mistefa Barzanî yê nemir, Serok Mesûd Barzanî û Serokê Herêma Kurdistanê Nêçîrvan Barzanî, wan ew nav li zarokên xwe kirine.
Bav û dayîka her 4 zarokan ji Rûdawê re gotin: “Ji ber ku em ji welatê xwe ji Kurdistanê, ji Mistefa Barzanî, Mesûd û Nêçîrvan Barzanî hez dikin, me navê wan li zarokên xwe kirin.”
Li gor agahiyan, rewşa tendirustiya her çar zarokan baş e û li nexweşxaneyê ne.
Nêzîkî 11 salan e, ku bavê wan 4 zarokan Elî Enwer Temo û malbata xwe li Sûdanê dimînin û di projeyên xerazeyên kolandina bîrên avê de kar dikin.
Li Rojavayê Kurdistanê, berê jî gelek malbatan navê serkirdeyên Kurdan weke Barzanî û Mesûd li zarokên xwe kirine.