Li Rojavayê Kurdistanê û navçeyên ser bi Rêveberiya Xweser a li Bakur û Rojhilatê Sûriyê, di 24 demjimêrên bihorî de 8 kes ji pêketiyên Coronayê jiyana xwe ji dest dan û 153 haletên nû yên pêketina bi vîrusê hatin tomarkirin.

Desteya Tendirustiyê ya Rêveberiya Xweser a li Bakur û Rojhilatê Sûriyê, amarên 24 demjimêrên bihorî yên Coronayê belav kir û li gor amarên nû, ji destpêkê ve heta niha zêdetirîn hejmara pêketina bi Corona û mirina bi sedema vê vîrusê li herêmê hatiye tomarkirin.

Hevserokê Desteya Tendirustiyê ya Rêveberiya Xweser a li Bakur û Rojhilatê Sûriyê, Ciwan Mistefa di daxuyaniyeke nivîskî de ragihand, ku 5 kes ji pêketiyên Coronayê li Hesekê ku 3 mêr û 2 jin in û 3 mêr li Qamişlo, Dêrik û Kampa Holê jiyana xwe ji dest dane.

Mistefa diyar kiriye, ku 153 haletên nû yên pêketina bi vîrusa COVID-19 li navçeyên Rêveberiya Xweser hatine tomarkirin û daye zanîn, ku 91 kes ji wan pêketiyên nû mêr û 62 kes jî jin in.

Li gor daxuyaniyê, di 24 demjimêrên derbasbûyî de 28 kes li Hesekê, 17 li Qamişlo, 27 li Dêrik, 8 li Girkê Legê, 2 li Rimêlan, 6 li Amûdê, kesek li Kampa Holê, 20 kes li Kobanî, 15 li Tebqa, 14 li Reqa, 11 li Minbic û 4 kes jî li Dêrezorê bi vîrusa COVID-19 ketine.

Herwiha 11 haletên nû yên başbûna ji Coronayê hatine tomarkirin.

Bi van amarên nû re, hejmara kesên ku heta niha li Rojavayê Kurdistanê û navçeyên Rêveberiya Xweser bi vîrusa COVID-19 ketine, gihîşte 3251 kesan, ku 103 kesan ji wan jiyana xwe ji dest dane û 646 kes jî baş bûne.