Alozîya rewşa sîyasî, ewlehî û aborî li Rojavayê Kurdistanê, nebûye rêgir li ber kar û çalakîyên rewşenbîrî, ku di nav de jî, guhdan bi pirtûka Kurdî tê dan û yek ji dîmen û nîşanên girîngîpêdana bi pirtûkan, vekirina pêşangehan e, ku tê de pirtûkên bi Zimanê Kurdî yan jî bi zimanên bîyanî, têne nîşandan.
Îro Pêşangeha Pirtûkan a Şehîd Herekol li bajarê Qamişloyê bi fermî vedibe.
Di pêşangehê de 39 weşanxane beşdar in ku weşanxaneyên hinek welatên Erebî yên weke Sûrîye, Misir, Lubnan û Iraqê jî tê de beşdar dibin.
Derdora 120 hezar pirtûkan ji alîyê Rêveberîya Pêşangehê ve hatine pejirandin û di pêşangehê de tên nîşandan.
Li pêşangehê hemû tedbîrên xweparastinê ji vîrusa Koronayê hatine wergirtin û tîmên tendirustîyê jî çavdêrîya rênimayên tendirustî li nava pêşangehê dikin.
Pêşangeh 6 rojan berdewam dibe û rojane du danan, danekê ji demjimêr 09:00 serê sibê heta 13:00ê nîvro û danekê ji demjimêr 17:00 êvarê heta 21:00 şevê derîyên wê vekirî dibin.