Li parêzgeha Amedê ya Bakurê Kurdistanê kermendekî din ê tendirustiyê bi Coronayê canê xwe ji dest da û bi vê jî li Amedê hejmara xebatkarên tendirustiyê ku bi Coronayê canê xwe ji dest dane gehişte 9 kesan.
Navê wê karmenda tendirustiya Amedê ku roja Duşemê 21ê Îlona 2020ê cane xwe ji dest daye Esra Alakuş e û 45 salî bû, ji roja 8ê Îlona 2020ê ve li Nexweşxaneya Perwerde û Lêkolînan a Gazîyaşargîl a Amedê çareserî werdigirt.
Li gor amarên Platforma Tendirustî ya Amedê, li sînorê wê parêzgehê heta niha 722 xebatkar û fermanberên tendirûstiyê bi Coronayê ketine û bi mirina Esra Alakuş hejmara karmendên tendirûstiyê ku bi Coronayê canê xwe ji dest dane gehişte 9 kesan.
Li aliyê din Rêveberê Tendirustiya Bajarê Amedê Cihan Tekin roja 21ê Îlonê ji ber jana ser û bê taqetiyê serdana nexweşxaneyê kiriye û testa wî ya Coronayê pozîtîv derketiye.
Li gor amarên dawî yên Wezareta Tendirustî ya Tirkiyê, li Bakurê Kurdistanê û Tirkiyê heta niha 304 hezar û 610 kes bi vîrûsa Coronayê ketine. Ji wê hejmarê 7 hezar û 574 kesan cane xwe ji dest dane, rewşa tendirustî ya hezar û 491 kesan nebaş e û 268 hezar û 435 kes jî baş bûne. Mehek berî niha hejmara miriyan di rojekê de nêzîka 20 kesan bû, lê niha ew hejmar gehiştiye nêzîka 60-70ê kesan di rojekê de.