Seroka Meclisa Rêveber a MSDê Îlham Ehmed radigihîne, "Rûsya rola xwe wek garantor nîşan dan, lê di vê rolê de têk çû."
Bi dirûşma "Ber bi kongreya nîştimanî ya şêniyên Cizîr û Firatê ve" panela 8`emîn a Meclisa Sûriya Demokratîk (MSD) li Qamişlo hat lidarxistin. Di panelê de 130 kesên ji nûnerên êl, partî, hêzên siyasî, ENKS, nûnerên Rêveberiya Xweser, rewşenbîr, hiqûqnas û kesayetên serbixwe beşdarî panelê bûn.
Seroka Meclisa Rêveber a MSDê Îlham Ehmed di panelê de axivî û ragihand, "Pêvajoya siyasî û rewşa ku Sûriye tê re derbas dibe pir aloz e. Aloziya Sûriyê di navbera hêzên derve de tê behskirin û wiha got: "Me dît ku civînên Cenêv û Astanayê neçûn serî, ji ber ku biryara Sûriyê di wan civînan de tune bû."
Herwiha Îlham Ehmed got: “Hikûmeta Sûriyê li şûna ku serî li çareseriya aloziya Sûriyeyê bide, ewlehî û aramiya herêmê têk dide û di navbera Kurd û Ereban de şer derdixe.”
Di berdewama axaftina xwe de wiha got: "Rêjîm hemû hewldanên ku em pêşkêş dikin ji bo bigihin têgihîştinan û çareseriya siyasî li Sûriyê hidiweşîne."
Îlham Ehmed tekez kir ku hevdîtinên wan bi hikumeta Sûriyê re bi ser neketin û wiha got: "Rûsya rola xwe wek garantor nîşan da, lê di vê rolê de têk çû."
Herwiha wiha got: "Bi destpêkirina diyaloga Kurdî-Kurdî re gotegot belav bûn ku ev diyalog xizmeta projeya cudaxwaziyê dike û Kurd bûne xwediyê hemû dewlemendiyên herêmê û Ereban jê bêpar kirine."
Berî niha, Wezîrê Derve yê Rûsyayê Sergey Lavrov gotibû; dibe ku çalakiyên Amerîkayê di pirsa Kurdî de rê li ber teqîneke cidî veke û diyar kiribû: “Rayedarên Amerîkayê hewl didin xweseriyeke Kurd a nîvdewlet damezrînin.”
Îlham Ehmed diyar kir jî, girîngiya diyaloga Kurdî - Kurdî di yekrêziya rêzên Sûriyê de ye û hemû gotegotên hatine avêtin ku dê herêmê veguhere devereke cuda mîna ezmûna Herêma Kurdistanê ne rast in.