Rêxistina Mafên Mirovan-Efrîn dibêje çekdarên Lîwaya Siqûr el-Şam ya girêdayî Tirkiyê 130 darzeytûnên welatiyê Kurd Mihemed Hesen Mistefa ji gundê Bêlê ser bi nahiyeya Bilbilê birrîne.

Rêxistina navborî herwiha diyar kir ku çekdarên Feyleq el-Mecid, nêzî 8000 darzeytûn li her 5 gundên Zerka, Çopana, Qêsim, Dîkê û Kêla birrîne.

Rêxistina navborî daye zanîn, ku çekdarên grûpa navborî gundiyan neçar dikin ku wan darzeytûn ji bo wan bibirrin da ku wekî êzing ji xwe re bifiroşin.

Çekdarên el-Hemzat jî bi hezaran dar li ser riya Raco birrîne ku temenê hin daran 100 sal e û wan wekî êzing difiroşin.

Herêma Efrînê ya Rojavayê Kurdistanê ji 18ê Adara 2018 ve û piştî êrîşekê ku 58 rojan dom kir, di kontrola hêzên artêşa Tirkiyê û komên çekdar ên opozisyona Sûriyê de ye ku Enqere piştevaniya wan dike.

Ji dema kontrolkirina Efrînê ji aliyê Tirkiyê û komên çekdar ve, bi dehan haletên binpêkirina mafên mirovan li hember welatiyên resen ên herêmê ku Kurd in, hatine kirin û rêxistinên mafên mirovan ên herêmî û cîhanî li ser wan binpêkirina raport belav kirine.