Serokê Lijneya Rêveber a Polîtburoya Partiya Demokrat a Kurdistanê (PDK), Fazil Mîranî, rexneyên tûj li serweriya Iraqê û nepabendbûna Hikûmeta Federal a bi Serokwezîr Mihemed Şîa Sûdanî ve anî. Mîranî diyar kir ku bêyî yekîtiya hêzên Kurdî, li Bexdayê bidestxistina mafên neteweyî ne mimkin e.
Mîranî di hevpeyvîna xwe ya li gel Rûdawê de, Serokwezîrê Iraqê Sûdanî bi bicîhneanîna peymanên bi Herêma Kurdistanê re tawanbar kir. Wî got, daxwaza Bexdayê ya ji bo "neteweyîkirina mûçeyên karmendan" li dijî destûr û sîstema federal a Iraqê ye, û ev yek zirar daye avahiya federal û welat veguherandiye avahiyeke "navendî û bêfonksiyon."
Mîranî bi eşkereyî bal kişand ser bandora hêzên derve, wekî Îran û DYA, li ser biryarên siyasî yên Iraqê. Wî got, "Serweriya Iraqê ne temam e," û amaje kir ku qelsiya navxweyî dihêle welatên biyanî bandorê li pêvajoyên biryardanê bikin, tewra li ser hilbijartinan jî.
Mîranî, ji bo parastina berjewendiyên Kurdî, tekezî li ser girîngiya nêzîkbûn û yekîtiya di navbera PDK û Yekîtîya Nîştimaniya Kurdistanê (YNK) de kir.
Wî anî ziman ku pirsgirêkên navbera her du partiyan encama "destwerdanên biyanî" û "komployên dijminên gelê Kurd" in, û got divê berjewendiyên neteweyî di ser her tiştî re werin girtin.
Di derbarê hilbijartinên Parlamentoya Iraqê de, Mîranî ragihand ku PDK dixwaze ji milyonek dengan derbas bibe û vê serdemê wekî "dema bicîhanîna destûrê" bi nav kir. Wî her wiha destnîşan kir ku PDK nûnertiya hemû pêkhateyên Kurdistanê dike.