Encûmena Niştimanî ya Kurd li Sûriyê (ENKS) bi daxuyaniyekê ragihand ku komên çekdar ên bi ser Partiya Yekîtiya Demokratîk (PYD) êrîşî ofîsên ENKSê dikin û ew êrîşên ev çend roj in berdewam in şermezar kir.
ENKSê di daxuyaniya xwe ya îro 16ê Kanûnê de ragihand, tevî şermezarkirina gelek hêz û partiyên siyasî û gelê Kurd, komên çekdar ên bi ser ewlehiya Partiya Yekîtiya Demokratîk (PYD) car din êrîşî ofîsa Partiya El Wehde ya Demokratîk a Kurdî li Sûriyê (Yekîtî) ku endama ENKSê ye kirin û herwiha bi molotofan êrîşî ofîsa Partiya Yekîtiya Kurdistanê-Sûriye ya li Kobanî hat kirin.
Di daxuyaniya ENKSê de hat gotin, ev kiryar nêzîkbûna Kurdan dike armanc û kiryarên bi vî rengî hatin şermezarkirin.
Hêjayî bibîrxistinê ye, 14 û 15ê Kanûnê jî ofîsên ENKSê yên li bajarokên Dirbêsiyê, Amûdê û li Hesekê rastî êrîşan hatibûn û tevî alên Kurdistanê hatibûn şewitandin.