Hêzên Tirkiyê û komên çekdar şeva bihorî çend gund û dever li navçeya Şêrawa ya ser bi herêma Efrînê ve ku hêj di kontrola hêzên Kurdî de ne, topbaran kirin.

Li gor çavkaniyên xwecihî, topxaneya artêşa Tirkiyê herdu gundên Merenaz û Elqemiye û derdora wan gundan li navçeyê kirine armanc.

Heman çavkaniyan dan zanîn ku piştî topbarankirina herdu gundan ji aliyê topxaneya Tirkiyê ve, çekdarên grûpên opozisyona Sûriyê ya girêdayî Tirkiyê bi çekên otomatîkî heman dever kirine armanc.

Ev sê roj in li pey hev, gund û deverên herdu navçeyên Şêrawa ya Efrînê û Şehba li bakurê Helebê rastî topbarana artêşa Tirkiyê û grûpên çekdar ên opozisyona Sûriyê tên.