Sazî û pêkhateyên Rêveberiya Xweser a li Rojavayê Kurdistanê, di salvegera 9ê Cotmeha 2019 a destpêkirina êrîşên dagirkirina bajarên Serê Kaniyê û Girê Spî de ji aliyê Tirkiye û komên çekdar ve, daxuyanî dan.
Di daxuyaniyan de bang li Neteweyên Yekbûyî (NY û welatên di dosyaya Sûriyê de çalak in hat kirin ku dagirkeriya Tirkiyê li herêmê bi dawî bikin û derbarê tawanan têne kirin de lêpirsîneke serbixwe bidin destpêkirin.
Rêveberiya Xweser a Bakur û Rojhilatê Sûrî di daxuyaniya xwe de bal kişand ser ku Tirkiyê bi dagirkeriya xwe ewlehî û aramiya herêmê têk biriye û tevî binpêkirina hemû qanûnên navnetewî hewl daye Sûriyê parçe bike.
Herwiha bang li NY, Yekîtiya Ewropa, Komkara Welatên Ereb, Rûsya û Hevpeymaniya Navnetewî hat kirin, sînorekî ji êrîşên dagirkeriya Tirkiyê re deyinin û komîteyekê ji bo belgekirina tawanên wê li herêmê ava bikin û derbarê tawanên kirine de jî, lêpirsîneke serbixwe vekin.
Rêveberiya Xweser di daxuyaniya salvegerê de dibêje, ew dê ji bo rizgarkirina Serê Kaniyê û Girê Spî û vegera koçberan li warê wan têkoşîna xwe bilind bikin.
Meclîsa Sûriya Demokratîk (MSD) jî di daxuyaniya xwe de, bang li NY, Sekreterê Giştî yê RY Antonio Guterres, Amerîka û Rûsyayê kir ku ji bo bidawîkirina dagirkeriya Tirkiyê li herêmên bakurê Sûriyê û derxistina destdirêjkaran ji malên niştecihên resen, bixebitin û koçber bi ewle vegerîn bajar û gundê xwe.
MSDê herwiha banga vekirina lêpirsîneke serbixwe derbarê binpêkirinên ku li Serê Kaniyê û Girê Spî kir û xwest, kesên Hevrîn Xelef şehîd kirine derxin pêşberî dadgeha navdewletî.