Malbata welatperwerê Kurd , Berdevkê PDK-Bakur Hemîd Kiliçaslan(Hemîdê Simeîl Axa), bi minasebeta 40 rojîya wefata Hemîd Kiliçaslan xwestin li Qoserê, li gundê Dêrika Simeîl Axa mewlûd û bibîranînek lidar bixin.
Li gel malbata Hemîd Kiliçaslan, rêvebir û endamên PAKê û yên PDK-Bakur û gelek welatperwer jî di bibîranîna mewlûda 40 rojîya Hemîd Kiliçaslan de li gundê Dêrika Simeîl Axa amade bûn.
Lê hêzên ewlekarîyê yên Dewleta Tirkîyeyê midaxaleyî vê bibiranînê kirin û gotin ‘’Qedexe ye ku hûn bi vî rengî kom bibin û qedexeye ku hûn bi girseyî herin ser mezelî’’.
Piştî axaftina malbata Hemîd Kiliçaslan û hêzên ewlekarîyê, nêzîkî 30 kesî çûn ser mezelî û Hemîd Kiliçaslan bibîranîn.
Li ser mezelî li ser navê PDK-Bakur Suheyl Mûcîn, li ser navê PAKê Serokê Teşkîlata Mêrdînê ya PAKê Bedran Acar, karsazê Kurd Bedrettin Karaboga, sîyasetmedarê Kurd îbrehîm Guçlu di derbarê jiyan û malbat û têkoşîna Hemîd Kiliçaslan axaftin.
Li ser mezelî li ser navê PDK-Bakur Suheyl Mûcîn behsa xebat û têkoşîn û biryardarî û dilsozîya Hemîd Kiliçaslan ya di xebata rêxistinî û ya di doza azadî, rizgarî û serxwebûna Kurdistanê de kir.
Endamê Meclîsa PAKê û Serokê Teşkîlata Mêrdînê ya PAKê Bedran Acar li ser navê Serokê Giştî yê PAKê Mustafa Özçelik û li ser navê hemû rêvebir û endamên PAKê Hemîd Kiliçaslan bibîranî û got ‘’Kek Hemîdê Simeîl Axa, kedkar û kadroyekî pêşneg ê doza azadî, rizgarî û serxwebûna Kurdistanê bû. Mixabin di van şerdên kambax ê Pandemîya Koronayê de ji nav me koça dawî kir. Ez li ser navê Serokê partîya me birêz Mustafa Özçelîk û li ser navê hemû rêvebir û endamên PAKê , di 40 rojîya wefata wî de ,sersaxîyê ji hemû malbat û heval û hezkirîyên kek Hemîd re dixwazim. Bila serê gelê Kurdistanê sax be’’.
Hemeşîrê Hemîdê Simeîl Axa û Karsazê Kurd Bedrettîn Karaboga jî behsa rol û girîngîya Hemîd Kilişaslan ya malbatî û eşîrî kir.
Sîyasetmedarê Kurd îbrehîm Guçlu jî di derbarê jîyana Hemîd Kiliçaslan ya Kurdewarî û welatperwerîyê û di derbarê xebata wî ya bênavber ya di doza Kurdistanê de axaftine kir.
Piştî bibîranîna li ser mezelî, li mala Hemîd Kiliçaslan mewlûd hate danîn.