Ji ber celteya dil, Dengbêj Esker Cizîrî jiyana xwe ji dest da. Cizîrî, dengbêjê herêma Botanê û ji ekola Mihemed Arif bû.
Dengbêj Esker Cizîrî welatiyê bajarokê Cizîrê yê parêzgeha Şirnexê ya Bakurê Kurdistanê bû û jiyana xwe dabû hunera Kurdî, do di saet 16.30an de, li mala xwe ya li Cizîrê celta dil derbas kir û jiyana xwe ji dest da.
Esker Cizîrî, yek ji dengbêjên Botan û ji ekola Mihemed Arîf û Hesen Cizîrî bû. Mihemed Arif Cizîrî û Esker Cizîrî tu caran hev nedîtine, lê li gor riwayetekê Mihemed Arif guhdariya dengê Esker Cizirî kiriye, deng û şêwaza wî ewqas ecibandiye ku Cizîrî weke kurê xwe bi nav kiriye.
Dengbêj Esker Cizîrî, di 1955an de ji dayik bûbû û bavê 9 zarokan bû. Berî 3 mehan bi vîrusa Koronayê ketibû û baş bûbû.