Grûpên çekdar yên li Efrînê 10 welatiyên Kurd ji gundên Efrînê revandin û hinek piştî demekê berdan, lê çarenivîsa beşek ji wan jî hîna ne diyar e.
Jêderekî ji Efrînê ji K24ê re ragihand, grûpa Cebhe El Şamiyê 2 welatiyên sivîl ji gundê Mîrka yê navçeya Mabeta bi navên Mistefa Husên û Yasîn Tahir Ebdo revandin.
Li gundê Dîkmedaşê yê navçeya Şera, grûpên çekdar 3 welatî ji bi navê Henîf Fehîm Arif, Ciwan Welîd Horo û Mistefa Îbrahîm Mistefa revandin.
Li gundê Remadiyê yê navçeya Cindirêsê jî, çekdaran 2 welatî bi navên Nûrî Ebdilrehman Reşîd û Selah Sebrî Reşîd revandin.
Herwiha wî jêderî amaje bi wê yekê kir, grûpên çekdar 3 welatî ji gundê Memila yê navçeya Raco revandin, lê piştî çend demjimêran ew berdan.
Li Efrînê, bi bihaneyên cuda û ji bo standina pereyan ji malbatên wan, welatiyên sivîl bi awayekî rojane ji aliyê grûpên çekdar ve têne revandin, li gor amaran jî ta niha zêdetir ji hezar kesên revandî çarenivîsa wan ne diyar e.