Weqfa Lêkolînî û Çandî ya Kurdî (KURD-KAV) êvara 21.03.2026ê, li Stenbolê li hola otelekê şeva pîrozbahîya newrozê li dar xist.
Li gel rêvebir û endamên KURD-KAVê, Serokê Giştî yê Partîya Welatparêzên Kurdistanê (PWK) Mustafa Ozçelîk û rêvbir û endamên PWKyê yên li Stenbolê bi malbatî beşdarî pîrozbahîyê bûn. Gelek sîyasetmedar û rewşenbîrên kurd jî beşdarî pîrozbahîyê bûn.
Endamê rêvebirîya KURD-KAVê Mazhar Kara, pêşkêşvanê şevê bû.
Pîrozbahî bi rêzgirtina ji bo şehîdên Kurdistanê destpê bû.
Paşê Serokê KURD-KAVê Mehmet Celal Baykara bixêrhatina beşdaran kir û axaftina destpêkê kir; behsa girîngî û xebatên KURD-KAVê kir.
Piştî axaftina Mehmet Celal Baykara, rêvebirîya KURD-KAVê mafê axaftinê da Serokê Giştî yê PWKyê Mustafa Ozçelîk û Serokê Giştî yê HAK-PARê Duzgun Kaplan.
Mustafa Ozçelîk di axaftina xwe de girîngîya yekrêzî, hevkarî, tifaqên neteweyî, kurdistanî yên li her çar perçeyên Kurdistanê û dîasporayê anî zimên û got ‘’Gava gelê me yê li Bakur, Başûr û Rojhilatê Kurdistanê û li dîasporayê bi awayekî girseyî piştgirîya xwe nîşanî gelê me yê Rojavayê Kurdistanê dan, ew şîara ‘Yek e, yek e, yek e; gelê kurd yek e. Yek e, yek e, yek e Kurdistan yek e’’ derket pêş. Bi ya me ev şîar îro li her çar perçeyên Kurdistanê jî rêbaza me nîşan dide. Em li Rojhilatê Kurdistanê pîrozbahî û piştgirîya Hevpeymanîya 6 Partîyên sîyasî yên Kurdistana Îranê dikin. Em hêvî dikin ku Rejîma Dewleta Îranê birûxe û rêya azadîyê ji gelê me yê Rojhilatê Kurdistanê re vebe. Em li Rojavayê Kurdistanê, piştgirîya heyeta temsîlî û biryarên Konferansa Qamişloyê dikin. Li Başûrê Kurdistanê daxwaz û hêvîya me ewe ku, hikûmeteke hevbeş bê ava kirin û hêza peşmerge, aborî, îdare, dîplomasî û hêza ewlekarîya Başûrê Kurdistanê bibe yek, nûneratîya Başûrê Kurdistanê bi awayekî yekgirtî li gel Bexda û dewletên cîhanê bibin mixatab’’.
Mustafa Ozçelîk di berdewamîya axaftina xwe de bal kişand ser pêwîstîya tifaqa neteweyî, niştimanî ya li Bakurê Kurdistanê û weha got ‘’Me wek partî û rêxistinên Kurdistanî û kesayetên serbixwe, di 14ê adarê de, li Amedê konferansek girîng li dar xist, me ji bo temsîlîyeteke neteweyî ya li Bakurê Kurdistanê gavek avêt. Herweha wek HAK-PAR, PDK-BAKUR, PÊLKURD, PSK, PWK, VEJÎN û kesayetên serbixwe yên kurdistanî, êvara 20ê Adarê me li Amedê, li Qada Şêx Seîd bi hev re newroz pîroz kir. Di 28-29ê adarê de jî li Amedê , bi mijara yekitîya neteweyî dê konferansek bê li dar xistin.
Em wek PWK, bangî alîyên ku li Qada Şêx Seîd bi hev re newroz pîroz kirine û beşdarên konferansa ku 28-29ê adarê dê li dar bikeve û hemû alîyên neteweyî, kurdistanî yên li Bakurê Kurdistanê dikin. Em dibêjin yên ku sîyaseta Dewleta Tirkîyeyê ya ‘Yek dewlet, yek milet, yek welat, yek al, yek ziman’ red dikin; çareserîya pirsa kurd û Kurdistanê bi ’Cimhûrîyeta demokratik, netewa demokratik, entegrasyona demokratik, hemwelatîya wekhev’ pênase nakin; yên hebûna miletê Kurd û Kurdistanê qebûl dikin, mafê çarenûsîya miletê Kurd, li ser axa Kurdistanê mafê statuyeke milî, coğrafik, sîyasî diparêzên; bêyî ku wextê wenda bikin, bila tifaqa xwe ava bikin. PWK di vê derbarê de amadeye ku her fedekarî û berpirsyarîya ku bikeve ser milê wê dê bicîh bîne’’.
Piştî Mustafa Ozçelîk, Serokê Giştî yê HAK-PARê Duzgun Kaplan axaft. Duzgun Kaplan di derbarê pirsa kurd û Kurdistanê û hevkarîyan de bîr û rayên xwe anî zimên.

Piştî van axaftinan, xelatên nivîskarên ku di pêşbazîya çîrokan a  KURD-KAVê ya bi zimanê kurdî (kurmancî û kirmanckî/zazakî) de biserketine pêşkêşî van nivîskaran hatin  kirin.
Di berdewamîya şevê de, slayteke ku ji kurte çîroka KURD-KAVê pêk hatibû hate nişandan.
Şeva pîrozbahîya newrozê ya KURD-KAVê bi stranan û govendê bidawî hat.
Buroya Ragehandine ya Partîya Welatparêzên Kurdistanê (PWK)