Li navçeya Şingalê dê hêzên ewlehiyê ji nû ve bên bicihkirin.

Bi serpereştiya Ofîsa Fermandeyê Giştî yê Hêzên Çekdar ên Îraqê li Bexdayê civîneke ewlehiyê ya bilind li ser rewşa Şingalê hat kirin.

Civîn li ser aramiya Şingalê, avedankirina wê û vegera koçberên wê bû ku Birêvebirê Ofîsa Fermandeyê Giştî yê Hêzên Çekdar Ebdulemîr Şemerî serpereştiya civînê kir.

Di civînê de qala dîtina çareseriyê ya ji bo pirsgirêkan û pêkanîna ewlehî û rewşeke guncav a ji bo vegera koçberan hat kirin.

Her wiha ji nû ve rêkxistina bicihbûna hêzên ewlehiyê yên li navçeyê û bidawîanîna rewşa çekdariyê hat nîqaşkirin.

49 hezar malbat hîn nevegariyane

Li gorî amarên Wezareta Koç û Koçberan a Îraqê, 49 hezar malbatên koçber ên Şingalê di nav kampên Herêma Kurdistanê û derveyî kampan de ne.

Ev malbat hîn nevegariyane cihên xwe yên berê.

Bidawîanîna rewşa çekdariyê

Serokên her du dezgehên îstixbarat û ewlehiya niştimanî yên Îraqê jî beşdarî civînê bûn.

Di civînê de tekezî li ser rêkxistina bicihbûna hêzên ewlehiyê û çalakkirina rola polîsên xwecihî hat kirin.

Her wiha bidawîanîna diyardeya çekdariyê ya li qezaya Şingalê hat xwestin.

Di heman demê de qala ji nû ve rêkxistina rewşa îdarî û çalakkirina rola hikûmeta xwecihî hat kirin da ku erkên xwe bi temamî bi cih bîne.

Peymana Şingalê

Sala 2020î di navbera Hewlêr û Bexdayê de ji bo asayîkirina rewşa Şingalê ya ji aliyê ewlehî û îdarî ve Peymana Şingalê hatibû îmzekirin.

Li gorî wê peymanê, divê dosyeya ewlehiya navxweyî ya navçeyê radestî polîsên xwecihî bê kirin.