Kampa malbatên Pêşmergeyên Partiya Demokrat a Kurdistanê-Îranê (PDK-Î) ya li Koyeyê hat armanckirin.

Di 48 demjimêran de cara sêyem e ku baregehên Partiya Demokrat a Kurdistanê-Îranê yên li Koyeyê tên armanckirin û vê carê êrişî Kampa Emîriyeyê hat kirin.

Li gorî agahiyên ku Rûdawê ji çavkaniyekî nava PDK-Îyê wergirtine, êriş îro berê sibehê saet 01:17an pêk hat û "Kampa EmîriyÊeyê" hat armanckirin.

Heman çavkaniyê amaje pê kir ku di encama êrişê de ti xisar çênebûne.

Roja sêşemê berê sibehê derdora saet 08:50î, bi dronan êrişî baregehên PDK-Îyê yên li Koyeyê hatibû kirin.

Qeymeqamê Koyeyê Tariq Heyderî ji Rûdawê re ragihand ku di encama wê êrişê de kesek bi sivikî birîndar bûye.

Her wiha çavkaniyeke ji nava PDK-Îyê diyar kir ku roja sêşemê beriya nîvro êrişeke din jî hatiye kirin û tê de navenda ragihandinê ya wê partiyê ya li "Kampa Azadiyê" hat armanckirin.