Cigêrayox / Nustox Seyîdxan Kurij bajarê Almanya Essen de bi minasebetê serrgera 100 şehadetê Şêx Seîdî û embazanê ey sero yew semîner da. Na seminer hete Yewîyeya Peroyî ya  Nuṣtox û Rojnamewananê Kurd Surîyê û Yewîya Nuṣtoxanê Kurdîstana Surîye ra ameyî organîze kerden.

Seyîdxan Kurij na semîner de, verê cu rewṣa Kurdîstan ya beyntarê 1918 – 1923 sero vindert, behsê peymananê Sykes – Pîcot, Mondros û Sevr kerd û no dem de xebatanê Cemîyeta Tealî ya Kurdîstan, Hereketa Koçgirî, gêrayiṣî Binbaṣi Noel, Ekrem Cemîl Paṣa û Celadet Bedirxan sero agahî da hedreyan.

Seyîdxan Kurij Kongreyanê Erzurum û Sîvas ra zî behs kerd û va, „seke yeno vatiṣ kurd nê kongreyan de nêameyê temsîl kerden, merdimê Ittîhat – Terakî bi nameyê bajaranê Kurdîstan beṣdarê nê kongreyan bîye. Xalit Cibîrî nêṣîyo nê kongreyan û nêwaṣto ke kurd beṣdarê nê kongreyan bibî.

Kurij cuwa pey ronayiṣê AZADÎ sero qisey kerd va, „ kurdan ferq kerd ke Mustafa Kemal û embazê ey wazenê yew dewleta netew ya tirk awan bikerê, hewl da ke xo organîzê bikerê. Netîceyê nê xebatan de AZADÎ ameyî ronayen. Azadî yew platformo netewî bi, heme beṣanê cemat ra endamê azadî estbîy. Ṣêx Seîd zî dostê azadî bi,o û Xalit Beg xalzayê yew bîn ê û Ṣêx Seîd û Yusuf Zîya dost bîye. Îhtîmal esto ke Lacê Ṣêx Seîdî Alî Riza endamê Azadî bi“.

Seyîdxan Kurij gerayiṣê Ṣêx Seîdî sero, kombîyayiṣanê ey sero, destpêkerdiṣ û binkewtiṣê Hereketa 1925, tepiṣtiṣê Ṣêx Seîdî sero zî agahî da û mehkima kerdiṣê Ṣêx Seîdî û embazanê ey, îfadeyê înan sero û dard kerdenê îna sero zî vindert û va, „Ṣêx Seîd zî embazanê ey mehkima de nêva ma poṣmanê, waharê dewaya xo vecîyayî. Na qala ke Ṣêx Seîd vato, „Qaṣo ma vara serebibirnaynê“ raṣt nê ya, zura yew rojnamewanê tirk yê rasîst a“.

 Kurij netelîga hereket sero zî vindert û va,“Hereketa 1925 yew hereketa netewî ya, helbet Ṣêx Seîdî yew merdimo dîndar bi û mîyanê hereket de mala û Ṣêx estbî, la no goreyê sosyolojîyê cemat normal bi, zaf welatanê dinya de merdimanê winayinan serektîya hereketanê mîlî kerda. Savcî zî vato ke“ ṣima zî sey Bosna – Hersek, sey miletanê Balkan waṣt yew dewleta xoser, Kurdîstan awan bikerê“.

Peynîye semînar de beṣdar persan persayê û Seyîdxan Kurij cewabê persan da.