PAK: 22ê Nîsane Roja Rojnamegerîya Kurdkî Pîroz Bo

PAK (Partîya Azadîya Kurdistanî): Coka tarîxê rojnamegerîya Kurdkî de têkoşînê pîlî, trajedîyê pîlî û hîşyarbîyayîşo mîlî esto.

A+A-

PAK (Partîya Azadîya Kurdistanî):

“Rojnameyo Kurdkî yo ewilin ‘Kurdistan’ 22ê Nîsana 1898 de Qahîre de hetê lajê Mîr Bedirxanî Miqdat Midhet Bedirxanî ra ame vetiş. Vetişê rojnameyê Kurdkî ser ra 75 serrî vîyartî. Vejyayîşê nê rojnameyî ra dima serra 1973 de Başûrê Kurdistanî de, roja 22ê Nîsane sey Roja Rojnamegerîya Kurdkî amey îlankedene û a roje ra net her serre na roje yena pîrozkerdene.

Rojnameyê Kurdistanî pêro-pîya 31 hûmare vejîya. 5 humarê ewilinî hetê Miqdat Midhet Bedirxanî ra amê vetiş. La zordarîya dewleta osmanîyan ver Miqdat Midhet Bedirxan nêeşka hûmaranê bînan vejo. Dima ra birayê ey Ebdurrehman Bedirxanî wezîfe girewt xo ser û dest bi vetişê Rojnameyê Kurdistanî kerd. Ebdurrehman Bedirxanî zî zulmê dewleta Osmanîyan ver Swîsre û Îngilîstan de dest bi vetişê Rojnameya Kurdistanî kerd. Rojnameyê Kurdistanî vetişê 31 hûmaran ra dima êdî nêvejîya (hejmar 1, 1898- hejmar 31, 1902).

Tarîxê rojnamegerîya Kurdkî eynî wext de xizmetê miletbîyayîşê Kurdan o. Ma eşkenê vaje rojnameyê Kurdkî destpêkê xopêhesyayîş û têkoşînê mîletbîyayîşê Kurdan yo modern o. Vejyayîşê rojnameyanê Kurdkî bîyê sebebê averşîyayîşê vîr, îtîqat, îlm, kultur û ronşvîrî.

Vejyayîşê rojnameyê Kurdkî (Kurdistan,1898) ra çend serrî badê, teşkîlatê netewî yê verên (Kurdistan Azmî Qewî Cemîyetî-1900) ame ronayene. A roje ra nat têkoşînê organîze û rojnamegerîya Kurdkî game bi game heta ewro ame û ewro zî her het ra neteweperwerîye dewam kena.

Roja ke rojnameyê Kurdistanî vejîyayo ra hetanî ewro bi hezaran (çi legal û çi îllegal) kovar û rojnameyê Kurdan vejîyayê. La her tim dewletê desthilatdarî nê kovar û rojname, mesul û nuştoxanê înan rê zulm û neheqî kerdê. Zulm û zordarîya ke mesul, nuştox û wendekaranê rojnameyê Kurdistanî (1898) rê bîyê, çi heyf ke ewro zî dewam kenê.

Hetanî nika xeylê rojnamegerê Kurd her çar parçeyanê Kurdistanî de erzîyayê hepisxaneyan û amê kiştene,

Hetanî ewro zî rojnamegerê Kurd nêeşkayê wezîfeyê xo bi azad bîyarê ca. Weşanê înan yenê qedexekerdiş û azadîya înan yena astengkerdene. Şerro ke Bakurê Kurdistanî de dewam keno de rojnamegerî timî benê hedef.

Coka tarîxê rojnamegerîya Kurdkî de têkoşînê pîlî, trajedîyê pîlî û hîşyarbîyayîşo mîlî esto.

Naye ra ma heme rojnamegerê Kurdê ke no rayîr de bîyê şehîd yad kenê û vanê, Roja Rojnamegerîya Kurdkî pîroz bo.”

22.04.2020

Buroya Çapemenî û Têkilî ya PAKî