Merkezê Xeberan- Cendermeyan par qezaya Gêrganisî ya Erzînganî de eşt keyeyêk ser. Operasyon de dest ronîya telefon û kitaban ser. Nê kitaban ra yew kitabê Dersim'in Kayip Kizlari, yo ke hetê  Kazim Gundoganî û Nezahate Gundogane ra amebi nuştene, o bîn zî kitabê bîyografîyê Îbrahîm Kaypakkayayî bi.

Kitabî dima ke ameyî 'muxafeza' kerdene teslîmê wayîranê ci nêbî. Aqibetê kitaban dima ra eşkera bi. Serdozgerîya Komare ya Gêrganisî seba kitaban fermanê 'îmhakerdişî' dabi. La mehkema seba kitaban wina yew qerar nêdabi.

Gore xebera rojnamegerê Duvarî Haci Bîşkînî bi îdîaya 'hetkarîya rêxistine'  eskeran eşt keyeyî ser. Serdozgerîya Komare ya Gêrganisî seba kitaban fermanê îmha da. Zabitnameyê îmha de îmzaya 3 cendirmeyan esta. Gore zabitnameyî kitabî bi fermanê serdozgerîye dayîreyê kalorîferan de ameyî veşnayene.