Barzanî: Şoreşa Îlonê Bingehek Bû Ji Bo Pêgihandina Rihê Kurdperweriyê

Barzanî: Şoreşa Îlonê Bingehek Bû Ji Bo Pêgihandina Rihê Kurdperweriyê

Serok Mesûd Barzanî bi helkefta 58mîn salvegera Şoreşa Îlonê peyamek belav kir.

A+A-

Serok Mesûd Barzanî bi helkefta 58mîn salvegera Şoreşa Îlonê peyamek belav kir. Barzanî dibêje: Ew destkeft û azadiya niha heye, berhem û berdewamiya qurbanîdan û têkoşîna zarok û xortên gelê me di şoreşa Îlonê de ye.

Pêncî û heşt sal berê û roja 11 Îlona sala 1961an, gelê Başûrê Kurdistanê bi rêbertiya Mele Mistefa Barzaniyê Nemir, li dijî hikûmeta wê serdemê ya Iraqê dest bi xebat û şerê çekdarî kir, ku di nava tevgera siyasî û rizgarîxwaza gelê Kurdistanê de weke Şoreşa Îlonê tê naskirin.

Serok Mesûd Barzanî bi vê helkeftê peyamek belav kir. Di destpêka peyama xwe de, serok Barzanî ragihandiye: “Şoreşa Mezina Îlonê bi rêbertiya cenabê Barzaniyê Nemir şoreşekî siyasî û civakî û çekdarî û seranserî ya gelê Kurdistanê bû ku bingeheke bihêz ji bo xebata rizgarîxwaziya gelê Kurdistanê li dijî sitem û dagîrkeriyê danî.”

Barzanî amaje bi beşdariya hemû pêkhateyên Kurdistanê di şoreşa Îlonê de dike û dibêje: “Di şoreşa Îlonê de Pêşmerge, kadro, mamosta, xwendekar, jin û hemû çînên civaka Kurdistanî ji netewe û olên cuda cuda, li hemû navçeyên Kurdistanê û pêkve û ji bo armanceke pîroz a neteweyî û niştimanî xebat kirin û dîrok û serwerî tomar kirin.”

Serok Barzanî destkeftên ku niha li Kurdistanê hene, weke berhemê têkoşîn û qurbanîdana di şoreşa Îlonê de bi nav kiriye û destnîşan kiriye: “Ew destkeft û azadiya niha heye, berhem û berdewamiya qurbanîdan û têkoşîna zarok û xortên gelê me di şoreşa Îlonê de ye. Her di vê şoreşê de bû ku îrade û xweragirî û evîna niştiman di nav rêzên gelê me de ewqas bihêz bû, ku herdem dijminê pirçek li beramber vê rastî şikestinê dihat û cara dawî îradeya dijmin anî ser masaya danûstandinê.”

Di beşeke din a peyama xwe de, serok Barzanî behsa giringiya şoreşa Îranê di pêgihandina nirxên mirovahiyê û kurdperweriyê di nava civaka Kurdistanê de dike û tekez dike: “Şoreşa mezin a Îlonê hem li dijî sitemkariyê bû, hem jî pêngavek bû ji bo pêgihandina mirovên Kurdistanê, ji bo wê yekê ku gelê Kurdistanê mafên xwe nas bikin û nirxên bilind ên mirovahiyê û Kurdperweriyê di nav xelk û kadro û Pêşmerge de dirust bibin, bi awayekî ku li hember dijmin jî bi tenê ji bo carekê jî, şoreşê dest ji bo kiryarekî nebir ku nakok be li gel nirx û yasayên şer. Wane û bihayên wê şoreşa mezin divê ji bo me hemûyan bi bilindî bimînê û bibin çira û rênîşandera paşeroja me û nifşên paşarojê.”

Serok Barzanî herwiha şehîdên şoreşê bi bîr tîne û rêz û pêzanînên xwe li hember xebata pêşmergeyên beşdar di şoreşa Îlonê de tîne ziman û dibêje: “Di salvegera pêncî û heştemîn salvegera hilpêkirina şoreşa Eylûlê da, pêzanînên min ji bo wan hemû Pêşmergeyên qehreman û wan têkoşeran heye ku di şoreşa Îlonê de rol hebûne û ked û qurbanî dane û xebat kirine, çi ewên di nav me de nemane û çi jî ewên ku hêj jî di jiyanê de mane. Hezaran silav li giyanê pakê şehîdên şoreşa Eylûl û hemû şehîdên rêya azadiyê.”

 

Ev nûçe 0 caran hatiye xwendin
Nûçeya berê û ya piştre

NÛÇEYE ŞÎROVE BIKE

BALKÊŞÎ: Şîroveyên ku têde; çêr, heqaret, hevokên biçûkxistinê û êrîşa li ser bawerî, gel û neteweyên din hebin, dê neyêne erêkirin.
JI kerema xwe re şîroveyên xwe jî bi gramera kurdî ya rast û tîpên kurdî binivîsin