Xelata Olof Palmeyî ya 2023yî dîyaye Erene Keskîn, Marta Chumalo û Nargese Mohammedi.

Xelata Olof Palmeyî ya ke Weqfa Yadkerdiş, Asayîşê Hemparî û Ferasetî ya Olof Palmeyî 1987 ra nata dana, emser ameye dayene Hemsereka ÎHDyî Erene Keskîn, psîkologa ukraynayîje Marta Chumalo û rojnamegere û aktîvîsta îranije Nargese Mohamedi. 

Keyepelê weqfe de ame vatene ke ''hîrê cinîyî seba ke azadîya cinîyan bîyarê ca nê prosesê şer, şîdet û teda de têkoşîn kenê layîqê na xelate ameyî dîyene.''

Merasîmê xelatdayîşî 1ê sibata 2023yî de roja çarşemeyî salona konserî ya Stockholmî de do bêro kerdene.