Merkezê Xeberan- Vîrusê Korona menga kanûne de şaristanê Wuhanî yê Çînî de vejîya meydan û bi desan welatan de vila bi.

Heta şanê 3ê adare roja sêşemeyî temamîya dinya de 93 hezar nêweşê vîrusî û 3 hezar û 200 qurbanî ameyî tesbîtkerdene.

Çîn de hûmara nêweşan bena tay

Çîn de 31 kesî mabênê rojêke de merdî. Hûmara merdimanê ke vîrusî ra kewtî zî 80 hezarî derbaz kerd. Çîn de bi temamî 2 hezar û 943 kesî vîrusî ra merdî. Çîn de hûmara nêweşan û yê qurbanan bena tay. Ame parekerdene ke Çîn de roja sêşemeyî têna 125 kesî vîrusî ra kewtî. Çîn de peynîya menga çeleyî ra heta nika tewr tay 50 mîlyon kesî binê karantîna de yê.

Koreya Başûre

Koreya Başûre de 5 hezar û 477 kesî vîrusî ra kewtî. 28 kesî zî vîrusê Korona ra merdî.

Îran

Îran de roja sêşemeyî 11 kesê bînî vîrusê Korona ra merdî. Goreyê doneyanê fermîyan Îran de 2 hezar û 336 kesî vîrusî ra kewtî û 77 kesî zî vîrusî ra merdî.

Îtalya

Îtalya de destpêk de 2 hezar û 502 kesî vîrusî ra kewtî. 79 kesî zî vîrusê Korona ra merdî. Goreyê doneyanê fermîyan roja sêşemeyî 24 saetanê peyênan de 27 kesê bînî vîrusî ra kewtî.

Japonya

Janponya de 293 kesî vîrusê Korona ra kewtî û 12 kesî zî tira merdî. Welat de 700 nêweşî zî binê karantîna de yê.

Fransa

Roja sêşemeyî Fransa de 4 kesê bînî Korona ra merdî. Hûmara nêweşan zî resaye 211 kesî. Welat de beşdarîya çalakîyan qedexe ya.

DYA

Roja sêşemeyî DYa de 4 kesê bînî Korona ra merdî. Welat de 117 kesan de nêweşîya Korona ameye tesbîtkerdene. Hûmara qurbanan resaye 9 kesî.

Ewropa de alarme

Vera vîrusê Korona asta Ewropa de alarme ame dayene. Merkezê Kontrolkerdiş û Vergirewtişê Nêweşîyan ê Ewropa asta asta alarme nermî ra vete berz. Almanya zî asta alarme nermê kêmî ra vete nerm. Eyaletanê Almanya de bi temamî 196 kesan de vîrus ame tesbîtkerdene. Îspanya de 153 nêweşî, Swêd de 56 nêweşî, Brîtanya de 51 nêweşî û Norweç de zî 32 nêweşî estî.

Rojhelatê Mîyanênî de, Afrîka de û Amerîkaya Latîne de vila beno

Rojhelatê Mîyanênî de Iraq de 32 nêweşî, Kuweyt de 52 nêweşî, Emîrîyanê Ereban de 21 nêweşî, Lubnan de 13 nêweşî û Erebîstana Suûdî de nêweşêk ameyî tesbîtkerdene.

Vîrus Amerîkaya Latîne, Awustralya û Afrîka de zî vila bi. Roja dişemeyî ra nata Tunus, Senegal û Fas de zî tay kesan de vîrus ame tesbîtkerdene.

Dîrektorê Teşkîlatê Weşîye yê Dinya (WHO) Tedros Adhanom Ghebreyesusî derheqê Vîrusê Korona (Covid-19) de qisê kerd û va, No vîro tebere welatê Çînî de hîna leze vila beno û tehluke zaf pîl o.

Ghebreyesusî va ke, înan hetanî ewro wina yew vîruso xirab nêdîyo û no vîrus gorê vîrusanê binan hîna leze vilka beno û hemoinan ra tehlukeyîn o.

Ghebreyesusî îzeh kerd ke eke seba Covid-19î  tedbîrê weşî bêrê girewtiş, vîrus yeno kontrol kerdene la nika no vîrus her hetê dinya de zaf leze vila beno.