Navenda Nûçeyan- Li parêzgehên Iraqê xwepêşandan berdewam in. Li Necefê ku dikeve başurê Iraqê xwepêşander li ber konsolxaneya Îranê kom û agir berdan avahîya konsolxaneyê.
Li gor medya xwecihî, di encama êriş û hewldanên hêzên emnî yên bo belavkirina xwepêşandanan de 80 kes birîndar bûn û piştî ku bûyer belav bûn, Fermandarîya Operasyonan a Necefê bi daxuyanîyekê aşkere kir ku li tevahîya wî bajarî qedexeya çûnûhatinê hatîye ragihandin û nehat dîyarkirin ka ew qedexe wê heta kengî berdewam be.
Jibilî Necefê li Bexdayê jî xwepêşandan berdewam bûn û li gor zanyarîyan, li wî bajarî jî di navbera hêzên emnî yên Iraqê û xwepêşandanan de alozîyan rû dan û di encam de 2 kes hatin kuştin û hejmareke xelkê sivîl jî birîndar bûn.