Navenda Nûçeyan- Wezareta Tenduristîya Kurdistanê bersiva wan malper û çavkanîyên medyayî da ku dibêjin, vîrûsa “Korona”, ya ku li Çînê bûye sebeba mirina herî kêm 80 kesan û li hinek welatên din jî belav bûye, derbasî Başûrê Kurdistanê jî bûye.
Di daxuyanîya Wezareta Tenduristîyê de hatîye gotin ku ew nûçe û agahî derew in ji ber ku ew nexweşî derbasî Kurdistanê nebûye.
Wezareta Tenduristîyê ragihandîye, bila xelkê Kurdistanê piştrast bin ku heta niha ew nexweşî derbasî Kurdistanê nebûye û tedbîrên pêwîst jî hatine girtin û dezgehên tenduristîyê bi tundî çavdêrîyê dikin.
Wezareta Tenduristîyê bang li welatîyan jî kirîye, der heqê nexweşîya Koronayê de tenê guh bidin çavkanîyên Wezareta Tenduristîyê û rêxistina tenduristîya cîhanî (WHO).