Berdevkê wezareta tenduristîya Kurdistanê, dr. Mihemed Qadir ji malpera fermî ya PDKê re gotîye, niha li Herêma Kurdistanê nêzîkî 20 nexweşxane bo nexweşên Koronayê hatine terxankirin. Beşek ji wan nexweşxaneyan ji alîyê kesên xêrxwaz ve hatine çêkirin û beşek jî yên hikûmetê ne. Lê êdî me biryar daye em nexweşxaneyên nû çênekin ji ber ku dema me nîne.
Dr. Mihemed Qadir her wiha gotîye, li şûna wê yekê me biryar daye em asta kalîteya nexweşxaneyên hikûmetê bilind bikin. Yanê ew diravê ku em li nexweşxaneyên nû xerc dikin emê bo pêşxistina nexweşxaneyan xerc bikin.
Berdevkê wezareta tenduristîyê daye zanîn, di mijara cîhazên oksîjenê de jî ti pirsgirêkek nîne û gotîye, tenê kêmasî di wir de ye ku pisportîya pêwîstî bo bikaranîna wan cîhazan nîne. Helbet li gelek welatan jî ev pirsgirêk heye.
Bi gotina dr. Mihemed Qadir, destpêkê li Kurdistanê derdora 70 cîhazên oksîjenê hebû lê niha zêdetirî 200 cîhazan heye.