Navenda Nûçeyan- Duhî li paytexta Êraq, Bexdayê xwepêşander rastî êrişa çekdarî hatin, herî kêm 16 kes hatin kuştin û bi dehan kes jî birîndar bûn.
Serokatîya Herêma Kurdistanê li ser wê rûdanê daxuyanîyek belav kir û ragihand, ew gelekî ji berdewambûna tundîyê li dijî xwepêşanderan û kuştina wan nîgeran in. Divê tawanbar demildest bên dîtin û dadgehîkirin.
Di daxuyanîyê de hatîye gotin ku xwepêşandana aşitîyane û sivîl mafekî qanûnî û rewa yê welatîyan e û ti carî ew êriş û tundî li dijî xwepêşanderan nayê qebûlkirin.
Serokatîya Herêma Kurdistanê hişyarî jî daye û ragihandîye, divê her kes û alîyek berpirsîyarane hereket bike da ku rewş ji kontrolê dernekeve û tiştên xeter neqewimin, xwîn nerije û hemû di çarçoveya qanûnê de kar bikin.
Çavkanî: Basnews