Li gor medyaya fermî ya hikûmeta Îranê, Şaredarê Baneyê, Wurya Wusuqî û fermanberekî şaredariya vî bajarî piştî lêkolînên Saziya Teftîşê hatine desteserkirin.

Hatiye ragihandin, ku roja Şemiya vê heftiyê mugetişên Saziya Teftîşê ji bo encamdana lêkolînan derbarê binpêkariyên Şaredarê Baneyê û fermanberekî vê şaredariyê li avahiya şaredariyê amade bûn û piştî lêkolînan, derketiye holê ku karên neyasayî û binpêkariyên darayî li şaredariyê hatiye encamdan.

Li gor agahiyan, Şaredar û karmendê Şaredariya Baneyê ku navê wî nehatiye diyarkirin, bi encamdana karên neyasayî û binpêkariyên darayî di şaredariyê de hatine tohmetbarkirin û piştî ku bi fermî ew tohmet arasteyî wan hate kirin, ew hatin girtin.

Berpirsekî Qaymeqamiya Baneyê jî nûçeya girtina şaredarê bajêr piştrast kiriye û gotiye, roja Şemiyê biryara girtinê di derheqê şaredar û karmendekî şaredariyê de derketiye, lê roja yekşemiyê kesê karmend bi mercê dadî û bi danîna pere hatiye berdan.

Bajarê Bane yek ji bajarên parêzgeha Sine ya Rojhilatê Kurdistanê ye û dikeve ser sînorê navbera Rojhilat û Başûrê Kurdistanê.

Li gor serjimêriya sala 2016 a Îranê, hejmara akinciyên Baneyê zêdetir ji 110 hezar kes e û piştî bajarên Sine, Seqiz û Merîwan, çaremîn bajarê mezin ê parêzgeha Sineyê ye.

RÛDAW