Şandeke Parlamentoya Urdinê bi serpereştiya Serokê Parlamentoyê, cîgirê yekem ê serok û 16 parlamenteran gihişt Hewlêrê û dê li gel Seroka Parlamentoya Kurdistanê Rêwaz Fayeq û berpirsên pilebilind ên Herêma Kurdistanê bicive.
Li gor nûçeya Rûdawê, sibeha îro Yekşemê, Serokê Parlamantoya Şahnişîna Urdinê Ebdulmunmi Udat, cîgirê yekem ê serok û 16 parlamenter, gihiştin Hewlêrê û li Firokexaneya Navdewletî ya Hewlêrê ji aliyê Seroka Parlamentoya Kurdistanê Rêwaz Fayeq û Desteya Serokatî û hejmareke parlamenterên Kurdistanê ve hatin pêşwazîkirin.
Li gor zanyariyên peyamnêrê Rûdawê, şanda Parlamentoya Şahnişîna Urdinê biryar e serdana Parlamentoya Kurdistanê bike û li gel Desteya Serokatiya Parlamentoyê, serokên fraksiyonan û Lijneya Peywendiyan bicive.
Biryar e piştî serdana Parlamentoya Kurdistanê, Serokê Parlamentoya Şahnişîna Urdinê û şanda pê re, li gel Serokê Herêma Kurdistanê Nêçîrvan Barzanî, Serokwezîr Mesrûr Barzanî û Serok Mesûd Barzanî civînan pêk bîne.
Herêma Kurdistanê û Şahnişîna Urdinê, peywendiyên dîplomatîk ên qayîm hene û di dawîn civînê de jî, roja 23/06/2021, Şahê Urdinê Şah Ebdullahê Duyem li Koşka Huseyniye ya li Emmanê, pêşwazî li Serokê Herêma Kurdistanê Nêçîrvan Barzanî kiribû.
Ev yekem serdana serokê parlamentoya welatekî ye ku di vê xula 5an de serdana Parlamentoya Kurdistanê dike.
Parlamentoya Kurdistanê dixwaze di vê xulê de peywendiyên li gel parlamentoyên welatên navçeyê û cîhanê qayîm bike, ji bo pevguhertina zanyariyan li ser karên parlamentoyan û qayîm û bihêzkirina peywendiyan li ser berjewendiyên hevbeş.