Navenda Nûçeyan- Fermandarê Hêzên Asayişê yên Aşûrî yên ser bi Hêzên Ewlekarîya Hundirîn Robêr Eyo ji ajanseke opozîsyona Sûrîyê re ragihand, li gor rêkeftina bi HSDê re, hêzên Rûsî ji 20 rojan ve kar li ser danîna xaleke serbazî li derdora bajarê Til Temirê dikin.
Dîyar kir jî, 25 otombîlên serbazî û 80 serbaz û fermandarekî Rûsî gihîştine wê xala Rûsî ya nû li derdora Til Temirê.
Aşkere kir jî, erkê wê xala Rûsî ew e, çavdêrîya rêkeftina agirbestê, birêvebirina gerên hevbeş çi bi HSD re û çi bi hêzên Tirkîyê re be. Herwiha dê serperiştîya belavbûna hêzên rêjîma Sûrîyê jî bike.
Piştî vekişîna hêzên Amerîkî ji hin navçeyên Rojavayê Kurdistanê, hêzên Rûsî derbasî herêmê bûn. Herwiha li gor rêkeftina HSD û rêjîma Sûrîyê jî, hêzên artêşa Sûrîyê derbasî Rojavayê Kurdistanê bûn, ji bo parastina sînor.
K24