Navenda Nûçeyan - Rêxistina Efûyê ya Navnetewî banga “çalakîyeke lezgîn” kirîye û xwestîye ku di dema şewba koronavirusê (Covid-19) de xetereyeke mezin li girtîgehan heye û divê bi sedan sîyasetmedar, mafparêz û rojnameger werin berdan. Rêxistinê herweha kampanyayeke îmzeyan daye destpêkirin.
Rêxistina Efûyê di bangewasîya xwe de bal kişandîye ser rewşa Selahattin Demîrtaş, Hevserokê Giştî yê kevn ê Partîya Gelan a Demokratik (HDP), Osman Kavala, Serokê Lijneya Rêveber a Anadolu Kulturê û karsaz û nivîskar Ahmet Altanî.
Rêxistinê ji bo vê kampanyayê metneke wiha weşandîye:
“Li Tirkîyeyê koronavirus bi şêweyeke metirsîdar û bi lez û bez belav dibe. Di rewşeke wiha de li girtîgehên gelek qelebalix û bê hijyen, xetereyek emezintir li ser jîyana bi hezaran girtî û karmendên girtîgehan heye. Di 13ê Nîsanê de ew yasa li meclîsê hat qebûlkirin ku pêşbînî tê kirin di encama wê de nêzîkî 90 hezar girtî zûtir tehlîye bibin.
“Lê rojnameger, mafparêz û kesên hê dadgehkirina wan jî berdewam dike tê de gelek kesên din ên tenê ji ber mafên xwe bikar anîne lê ji ber yasaya dijterorê hatine dadgehkirin nikarin fêdê ji vê bigirin. Bang bikin da ku ew kesên ne bi şêweyekî adilane li girtîgehê tên girtin serbest bibin û kesên li girtîgehan dimînin bikaribin derfetên tenduristîyê bidest bixin ku ev derfet ji tevahîya civakê re tên pêşkêşkirin. Îmzeya xwe bavêje!"
Bianet