Wezîrê Navxwe yê Herêma Kurdistanê Rêber Ehmed got: Hikûmeta Herêma Kurdistanê pabend e bi azadiya derbirînê û gihandina zanyariyan bo rojnamevanan.
Rêber Ehmed îro 27ê Adarê di konferanseke rojnamevanî de got: “Medya bi pênaseya xwe hêza çarem e û di nav wê çarçoveyê de jî rêz lê tê girtin. Hikûmeta Herêma Kurdistanê jî pabend e bi azadiya raderbirînê û gihandina zanyariyan bo hemû rojnamevanan.”
Got jî: “Yasayên ku li parlamento û hikûmeta Herêma Kurdistanê kar li ser tên kirin, ev derfet ji medyayê re peyda kiriye. Rola medyayê jî ji bo parastina lihevhatina civakî, gihandina agahiyên pêwîst ji civakê re û naskirina diyardeyên neşîrîn, ji bo çareseriyên guncayî ji wan re bên dîtin.”
Wezîrê Navxwe got jî: “Kesek ji me ne li dijî wê bû ku medya behsa bûyerên rojên borî bike. Lê belê divê diyardeyên nexweş bi her kesî re bên raberkirin, da ku careke din dubare nebin.”
Herwiha got: “Daxwaza me ji medyayê ew e, ji kerema xwe ji bo zêdekirina temaşevan û şopînerên kuştinan neşopînin. Di şûna wê de, ji bo çareserkirina pirsgirêkan, romala wan bûyeran bikin. Ji kerema xwe re di bernameyên xwe de, rola polîs, dozger û bijîşka dadî negirin û rasterast bi sûcdaran re neaxivin, ji ber ku ew dihêle ku sûcdar sûcê xwe rewa bike.”