Qeyûmê Amedê Hasan Basrî Guzeloglu ku di roja duyemîna a tayînkirina xwe de 29 karmend ji kar dûr xistin û 8 karker û 2 şêwirmend jî ji kar derxistin, niha jî xwendekarên stajyer xistine hedefa xwe.
Xwendekarên pola dawîn ên lîseyên pîşesaziyê, beriya ku hevşaredarê Amedê Adnan Selçûk Mizrakli ji peywirê bê girtin, ji bo ku staja xwe ya mecbûrî bikin serî li şaredariyê dabûn. Li ser serlêdana xwendekaran, biryar hat dayîn ku 96 xwendekar li şaredariyê û 45 xwendekar jî li Midûriyeta Giştî ya Îdareya Av û Kanalîzasyonê ya Amedê (DÎSKÎ) staja xwe bibînin.
Xwendekarên ku amadekariyên destpêkirina staja xwe dikirin, agahiyên ku staja wan hatiye rawestandin bihîstin. Li ser vê yekê jî xwendekar tevî dayik û bavên xwe çûn şaredariyê û xwestin agahî bigirin. Rayedarên şaredariyê ji xwendekaran re got ku stajên wan hatine rawestandin. Çend roj piştre jî qeyûm bi hinceta ‘budçeya kêm’, staja 141 xwendekaran betal kir.
Xwendekara Lîseya Pîşeyî û Teknîkê ya Anadoluyê ya Şehîtlîk a Navçeya Yenîşehîrê Arjîn Demîrbaş axivî û diyar kir ku wan li gel ku serlêdana xwe beriya tayînkirina qeyûm kiriye jî, qeyûm bi hinceta ‘Budçeya kêm’ serlêdana wan betal kiriye. Demîrbaş got ku heke ew stajê nekin, dê ji polê derbas nebin û keda wan salekê jî biçe avê.
E-ROJNAME