Partiya Welatparêzên Kurdistanê (PWK) ji bo salvegera Komkujiya Şingalê peyamek belav kir.
Di daxuyaniya PWKê de wiha hat gotin;
Ji bo pêçandina birîna kurdên Êzidî pêwîstî bi bernameyeke taybet heye
Îro dehemîn salvegera komkujîya kurdên Êzîdî ye ku ji alîyê rêxistina hov û terorîst DAIŞê ve li Şingalê û derdora wê pêk hat.
Roja 3ê tebaxa 2014an, rêxistina DAIŞê êrîşeke berfireh bir ser navçeya Şingalê û derdora wê. Di encama vê êrîşî de, bi hezaran welatiyên sivîl ên kurdên Êzidî hatin kuştin û bi hezaran keç, jin û zarokên êzidî jî hatin êsîr kirin.
Di wê êrîşê de bi sed hezaran xelkê sivîl yên kurdên Êzidî mecbûr man ku cîh û warên xwe bihêlin û terk bikin.
Birîna jenosîda Şingalê ya xuşk û birayên me yên kurdên Êzidî birîneke kûr e û ev birîna hemû kurd û kurdistanîyan e.
Heta nuha jî gelek keç û jinên kurdên Êzidî di destên DAIŞa hov de ne û çarenivîsa wan ne diyar e.
Heta nuha jî piranîya gelê me yê Êzîdî ku mecbûr mane Şingalê terk bikin, nekarîn vegerin ser cih û warên xwe.
Divê Parlamento û Hikûmeta Herêma Kuristanê ji bo pêçandina vê birîna kûr û dijwar ya xuşk û birayên me yên kurdên Êzidî bernameyeke taybetî amade bikin û bi cîh bînin.
Em bangî Netewên Yekgirtî dikin ku vê komkujî û jenosîda kurdên Êzidî bi awakî fermî qebûl bikin.
Di dehemîn salvegera jenosîd û komkujîya Şingalê ya xuşk û birayên me kurdên Êzidî de,em rêxistina hov û terorîst DAIŞê û hemû piştgirên wan careke din şermezar û rûreş dikin.
Em di dehemîn salvegera jenosîda Şingalê de, hemû şehîdên vê jenosîdê bi giramî bibîr tînin; em xemxur û şirîkê hemû êş û birînên xuşk û birayên me yên kurdên Êzidî ne.
03.08.2024
Buroya Ragehandinê ya Partîya Welatparêzên Kurdistanê (PWK)