Armanca PDK û YNKê ew e ku alîyên din ên sîyasî jî beşdarî gotûbêjan bikin, da ku bi yekdengî ligel Bexdayê biaxivin, bi taybetî jî li ser mijara asayîkirina rewşa deverên Kurdistanî yên li derveyî îdareya Herêma Kurdistanê û sekinandina erebkirinê û mijara hilbijartinên pêşwext.
Kakemîn Necar, Endamê Polîtburoya PDKê li ser vê mijarê got: “Sedema pêkanîna şanda sîyasî ya hevpar ew e ku niha çendîn dosyeyên sîyasî hene, weke mijara hilbijartinan, erebkirin û madeya 140, ku em dixwazin Kurd li ser wan yekdeng bibin.”
Herwiha Serdar Herkî, Endamê Serkirdetîya YNKê daxwaz kir; berî ku şanda hevpar serdana Bexdayê bike, stratejîya gotûbêjkirina ligel alîyên sîyasî yên Iraqê, were dariştin.
PDK û YNKê dest bi gotûbêjan kirine, tiştê maye ew e ku bigihin encameke giştgîr a dariştina sîyaseteke hevbeş û beşdarkirina alîyên din ên sîyasî bo gotûbêjên ligel alîyên Iraqê.