Endamê Ofîsa Siyasî ya Partiya Demokrat a Kurdistanê (PDK) Hêmin Hewramî ragihand ku vegera nûnerên wan a bo Bexdayê, encama peymaneke nû ya bi "Çarçoveya Hevahengiyê" re ye.
Hewramî destnîşan kir ku ev lihevkirin bi temamî li ser bingeha destûra Iraqê û parastina mafên xelkê Herêma Kurdistanê hatiye avakirin.
Para Kurdan di Hikûmeta Iraqê de
Hewramî diyar kir ku di kabîneya nû ya Iraqê de 4 wezaret ji bo Kurdan hatine veqetandin ku ev in:
Wezareta Karên Derve, Avedanî û Niştecihkirinê, Dad û Jîngeh. Hewramî bi bîr xist ku ji ber encamên hilbijartinê para PDKê zêdetir e û îhtimaleke mezin heye ku wezaretên Karên Derve û Avedaniyê ji aliyê PDKê ve werin birêvebirin.
Du rê li ber YNKê hene
Hewramî li ser rewşa navxweyî ya Kurdistanê û nakokiyên bi YNKê re jî diyar kir ku hewlên YNKê tenê bûne sedema "windakirina demê" û got ku pirsgirêka wan li ser postan e, ne li ser bernameya hikûmetê ye.
Hewramî ji bo çareseriyê du rê nîşan dan got, “An çalakbûna parlamentoyê û avakirina hikûmetê, an jî berê xwe dana hilbijartinên pêşwext.”