Serokê Herêma Kurdistanê Nêçîrvan Barzanî bi serdanekê li Almanyayê ye û îro li Berlînê bi Şêwirmendê Almanyayê Olaf Scholz û hejmarek berpirsên din ên wî welatî re dicive.
Serokê Herêma Kurdistanê di civîn û hevdîtinên xwe yên ligel berpirsên Almanyayê de, dê pêwendiyên Hewlêr û Bexdayê, xurtkirin û berfirehkirina hevkariyên hevbş ên navbera Hewlêr û Berlînê di warên leşkerî û mirovî de gotûbêj bike.
Endamê Parlamentoya Almanyayê yê Partiya Keskan û Endamê Komîteya Mafên Mirovan Max Lucks li ser serdana Nêçîrvan Barzanî dibêje: “Ew hevdîtin zêde girîng e û wê yekê nîşan dide ku Herêma Kurdistanê-Iraq bo Almanyayê yek ji nêzîktirîn hevpeymanên navçeyê ye.”
Nêzîkî sê mehan e hinardekirina petrola Herêma Kurdistanê hatiye rawestandin û wê yekê nakokiyên di navbera Hewlêr û Bexdayê de zêdetir kirine.
Almanya ku bihêzbûna Herêma Kurdistanê weke mifteya istiqrara aborî û siyasî ya li Iraqê dibîne, dixwaze ku di demeke herî nêzîk de çareseriyek ji bo pirsgirêkênên di navbera Hewlêr û Bexdayê de bê dîtin.
Cîgira Serokê Fraksiyona Keskan li Parlamentoya Federal a Almanyayê, Agnieszka Brugger derbarê serdanê de wiha dibêje: “Civîneke pir girîng e û her wiha qedirzaniyeke wê ya pir mezin heye ji bo ku şêwirmendê Komara Federal a Almanyayê bi taybetî wê demê ji bo wê civînê terxan dike. Ev tê wateya ku em li ser têkilî û gotûbêjan berdewam in. Em guh didin rewşa deverê. Hêj pêdiviya xelkê bi alîkariyan heye, bê guman ev serdaneke pir û bêhed girîng e, ku em hemû bi kelecan li hêviya wê ne û em bi vê serdanê dilxweş in.”
Almanya ku piştî derketina DAIŞê piştevaneke girîng a Hêzên Pêşmerge bû û 2.4 milyar euro pêşkêşî koçberên êrîşên DAIŞê kiriye, ji nêzîk ve çavdêriya hewildanên ji bo nehîştina tevgerên DAIŞê dike û aniha ji vejîna rêxistinê nîgeran e.
Berpirsê Komîteya Têkiliyên Derve ya Partiya Keskan Jürgen Tritten jî têkildarî serdana Nêçîrvan Barzanî ya bo Almanyayê dibêje, “divê Hikûmeta Herêma Kurdistanê û Hikûmeta Federal nakokiyên xwe yên bi hev re çareser bikin. Ji ber ku diyar e ku em naxwazin yekparçeyiya xaka Iraqê bixin jêr pirsyarê, lê em dixwazin ku Herêma Kurdistanê li wir bibe navçeyeke bihêz û geş.”
Rewş û jiyana Kurdên Êzidî li navçeyên Kurdistanî yên li derveyî îdareya Herêma Kurdistanê dê mijara sereke ya hevdîtinên Nêçîrvan Barzanî û berpirsên Almanyayê be ku dixwazin riyên nû bibînin daku zêdetir giringiyê bidin vê civakê û bi alîkariya Serokê Herêma Kurdistanê Rêkeftina Şingalê cîbicî bikin.
Rûdaw