Serokê Herêma Kurdistanê, Nêçîrvan Barzanî di pêncemîn salvegera jenosayda kurdên Êzîdî de, peyamek belav kir û daxwaz ji Netewên Yekgirtî kir ku “komkujiya kurdên Êzîdî weke jenosayd nas bike”.
Îro 3 Tebaxa 2019, pêncemîn salvegera êrişa DAIŞê bo ser Şingalê û derdora wê û komkujiya Kurdên Êzîdî ji aliyê wê rêxistinê ve ye.
Bi vê helkeftê, Serokê Herêma Kurdistanê, Nêçîrvan Barzanî peyamek li ser twîtterê belav kir.
Nêçîrvan Barzanî di peyama xwe de dibêje: “Di pêncemîn salvegera komkujiya kurdên Êzîdî de li Şingalê, em ji dil ve wan bi bîr tînin ku bûne qurbaniyên destê dilreqiyên DAIŞê li Kurdistanê û cihên din. Em ranawestin heta em terorê ji nav nebin û revandiyan jî venegerînin.”
Nêçîrvan Barzanî herwiha di peyama xwe de ji Netewên Yekgirtî daxwaz kiriye “ji bo rêgirtina ji kiryarên hevşêwe, wê komkujiyê weke jenosayd nas bike”.