Navenda Nûçeyan - Fermandarê Giştî yê HSDê Mezlûm Ebdî tora xwe ya civakî Twitterê de di derbarê bûyerên li girtîgeha Hesekê ya çekdarên DAIŞê tê de isyan kirine de nivîsî: “Bi saya keda mezin a hêzên me û nêzîkatîya objektîf û bilez a li hemberî isyana girtîyên DAIŞê yên di girtîgehê de, me karî rê li ber karesatekê bigirin û rewşa di hundirê girtîgehê bixin bin kontrolê, bêyî ku ti rewşên revînê çê bibin.”
Mezlûm Ebdî herwiha got: “Divê hevpeymanên me û civaka navdewletî asta xebata xwe bilind bikin, ta ku çareserîyên bingehîn ji vê pirsgirêka navdewletî re were dîtin.”
Du roj berî naha derenge şevê çekdarên DAIŞê isyan li girtîgeha taxa Giwêran a Hesekê de kiribûn, derîyên hundirîn ên girtîgehê şikandin û dîwarên di navbera odeyan de rûxandin û qata jêrîn a girtîgehê jî kontrol kirin.
Hatibû ragihandin ku hejmarek ji çekdarên DAIŞê revîyabûn, lê berdevkê Fermî yê HSDê Kîno Gabrîyel duh di daxuyanîyekê de tekez kir, ti çekdarek nerevîya ye û ew kontrola rewşê dikin.