Navenda Nûçeyan- Wezareta Berevanîya Tirkîyê di daxuyanîyekê de aşkere kir, ku roja Pêncşemê 16ê Çileya 2020 “li navçeya Operasyona Kanîya Aştîyê, otomobîlekê xwe bi yekîneyeke gerok a hêzên wî welatî ve teqandîye û di encamê de 3 leşkerên wî welatî hatine kuştin.”
Wezareta Berevanîya Tirkîyê behsa ti hûrgilîyên êrîşê nekirîye û cihê ku êrîşê jî bi temamî dîyar nekirîye û tenê ragihandîye, êrîşa li dijî hêzên wan “li navçeya Operasyona Kanîya Aştîyê” pêkhatîye.
Li alîyekê din, çavkanîyên Artêşa Niştîmanî ya ser bi Opozisyona Sûrîyê ve ku Tirkîye piştevanîyê lê dike, dîyar kirine ku êvara derbasbûyî li bajarokê Sulûkê yê ser bi Girê Sipî ve, di encama teqîna tankereke avê ya bombekirî de, 5 çekdarên wan û 3 leşkerên Tirkîyê hatine kuştin.
Bajarokê Sulûkê ku dikeve başûrê rojhilatê Girê Spî, piştî êrîşa Cotmeha 2019an a Tirkîyê bo ser Rojavayê Kurdistanê, di bin kontrola Artêşa Tirkîyê û komên çekdar ên Sûrî de ye.
Artêşa Tirkîyê roja 9ê Cotmeha 2019an û piştî ku Rêveberîya Amerîkayê ya bi serokatîya Donald Trump helwesta xwe guhert û biryara vekişandina hêzên xwe ji Sûrîyê aşkere kir, êrîşî Rojavayê Kurdistanê kir.
Di encama wê êrîşê de, Tirkîyê bi alîkarîya komên çekdar ên opozyona Sûrîyê herdu bajarên Serê Kanîyê û Girê Spî û bi dehan gundên Rojavayê Kurdistanê kontrol kir.